كندا



كندا
1- جواز سفر ساري
2- عدد 2 صورة شخصيه حديثه
3- كشف حساب بنكي
4- سجل تجاري وبطاقه ضريبيه لاصحاب الاعمال
    او خطاب من جهه العمل للموظفين
    او شهاده قيد من الجامعه للطلبه
5- وثيقه تأمين لمن هم اكثر من 70 سنه
6- خطاب توضيح سبب الزيارة
7- نموذج السفاره
8- شهاده تحركات خلال ال7 سنوات الماضيه
9- شهاده الميلاد
مده الحصول عالتأشيرة من 15 يوم – 20 يوم ،، يتم اجراء مقابله شخصيه

العنوان: El Fardous Tower, 2005 (A) South 18th Floor، كورنيش النيل، الدواوين، Cairo، محافظة القاهرة‬ 11221
الهاتف: 02 24612200 

 طيب يا جماعه بالنسبه للسفر و الهجره للدول الغربيه ...
تاني اسهل طريقه فى التاريخ للهجره بعد الهجره العشوائية للولايات المتحده هى ...( اقرأ البوست للاخر)
كندا ....الدراسه فى كندا طريقه سهله جدا و اول مميزاتها 1-انها بتعطيك الاقامه الدائمه مدى الحياه ( Permanent Resident Card )وبعدها ب 4 سنوات تقدر تقدم على الجنسيه الكنديه ...!!!
2- مش شرط تحاول تدرس ماچستير او دكتوراه او كليه 4 سنين ...يعنى ممكن تنقى أرخص حاجه ممكنه و مدتها قصيره زي مثلا قرص مطبخ لمده 10 شهور ، و بعدها تقدم على الاقامه الدائمه و لما تحصل على الاقامه الدائمه يصبح لك كافه حقوق المواطن الكندي ماعدا الباسبور و حق التصويت فى الانتخابات .
و ماهى المميزات من حصولك على الاقامه الدائمه ؟؟
1- تأمين صحي زي المواطن الكندي تماما بل زي اللي عند رئيس وزراء كندا
2- انت راجل مهندس او محاسب او مدرس او اي حاجه او عاوز تدرس حاجه تانيه ...ادرس قرص مطبخ او اي حاجه تافهه قصيره فقط علشان تأخذ الاقامه الدائمه و بعد حصولك على الاقامه يحق لك زي اي مواطن كندي التقديم فى اي جامعه كندية و ادرس اللي انت عاوزه و مش هاتدفع فلوس زي الطلبه الأجانب لان كندا بتعتبر المقيم زي الكندي ( غير أمريكا تماما فى النقطه دي )
و فى الحاله دي الحكومه هاتعطيك حاجتين ...اولا قرض الدراسه الجامعيه ثانيا منحه لا ترد و اعتقد لو مافيش حاجه اتغيرت كانت 750 $ كندي شهريا علشان تساعدك انك تتفرغ للدراسه ...( بس برضه ممكن تشتغل part time ...كام ساعه فى الأسبوع علشان تزود دخلك )
( ده لو كنت اصلا عاوز تكمل دراسه و لو مش عاوز خلاص البلد قدامك و عندك كافه حقوق المواطن الكندي انزل سوق العمل )
طيب دي كل المعلومات الحلوه ...ندخل بقى فى المعلومه الصعبه و كيفيه حلها ...!!!!
الموضوع ده هايكلفك شاكب راكب حوالي 15 الف دولار كندي يعنى حوالي 100 الف جنيه مصري ...!!!!
بالنسبه للناس اللي معاها ...مافيش مشكله
بالنسبه للناس اللي ممكن تبيع اي حاجه بما فيها ارض او ميراث او حتى بيته ...صدقنى الموضوع يستاهل و بكره تجيب أحسن منه 100 مره و مافيش اي مغامره فى الموضوع ..
الناس بقى اللي مش معاها و ماعندهاش حاجه تبيعها ...!!!
كل شله من 5 او 6 شباب يجمعوا من بعض و يعملوا قرعه و يبعتوا الاول ثم الثاني و هكذا ...الموضوع مش هزار ...اقسم بالله اصدقائى المغاربه عملوها كثييير و بقالهم سنين بيعملوها لدرجه ان مونتريال مليانه مغاربه من الطبقه الفقيره و المتوسطه فى المغرب و كنت هاجنن الناس دي بتيجي كندا دراسه ازاي لحد ما شرحولي الفكره ...!!!
ساهم فى نشر المعلومه حتى لو لم يكن لك رغبه فى السفر حتى يرزقك الله برزق الناس ...تمنياتي بالتوفيق للجميع
تعديل : ده لينك واحده من الكليات اللي كل مليانه ناس جايه بس علشان الاقامه 😂
http://www.collegelasalle.com/
و ده واحده تانيه
http://www.vaniercollege.qc.ca/
و ده واحده تالته
http://www.collegecanada.com/

هجرة العمالة الماهرة – Federal Skilled Immigration
.. الحقيقة البوست ده مؤجل من زمان. يمكن من 8 أو 9 شهور فاتوا. كنت ساعتها في عز المعمعة بتاعت الورق والتقديم والبحث والقراية وكدة. وكان كثير من أصدقائي في الشغل اللي كانوا عارفين الموضوع بييجوا يسألوني في حاجات ليها علاقة بالموضوع, لكن كان أغلب الناس بتقف عند حتة السؤال دي وخلاص. وكذا حد كان مش مصدق اني ماشي في الموضوع لوحدي من غير محامي وكنت ساعات بحس من الأسئلة انه حاسس اني مخبي حاجة, وكنت بعديها.
جالي ساعتها خاطر كدة اني أكتب على Facebookأشرح فيه الموضوع عشان اللي حابب يستفيد, وبعدين رجعت في كلامي. قلت اني لو كتبت كلام كثير وبعد كدة معرفتش أهاجر الكلام هيفقد مصداقيته, وهيبقى شكلي وحش.

المهم, أول أما ربنا أراد ان الموضوع يتم والناس معايا في الشغل ابتدت تعرف, تحولت فجأة لنجم سينمائي .. الناس كلها عايزة تسلم عليا وتصاحبني وتهزر معايا, وبقيت حتى لما بستظرف أو أقول نكتة بايخة, الناس بتضحك :)
وفجأة بقيت أعمل "ندوات" يومية أشرح فيها لناس كثير أعرفهم ومعرفهمش يبتدوا ازاي ويعملوا ايه ويحضروا ورق ايه ويقدموا امتى والصعوبات اللي ممكن تواجههم ايه هيا إلى آخره .. وحسيت ساعتها ان كلامي بقى ليه قوة الصخر. اللي بقوله محدش بيعيده ورايا. الإجابة اللي بجاوبها على أي سؤال محدش بيشكك فيها. والأهم اني تأكدت ان الكلام من غير فعل ملوش قيمة .. الناس عايزة تشوف example قدامها عشان تصدق.
لحد النهاردة الناس بتكلمني وأنا في كندا كل يوم تقريبا عشان تسألني عن الموضوع ده. وأنا أول شهر هنا بصراحة مكنتش رايق أكتب البوست ده لأني كنت متأكد انه هيبقى طويل ومحتاج تركيز مني. لكن الحمد لله جه الوقت.
خلينا نتفق على حاجة. الموضوع سهل وصعب. صعب لو انت مش مركز ومش مديله الأهمية الكافية في حياتك. عشان تهاجر لازم الموضوع ده ياخد حيز كبير من تفكيرك ومن وقتك ومن حياتك.لازم يكون عندك motive قوي جدا انك تهاجر. مش انك سمعت ان واحد عرف يهاجر ف الله بقى أنا كمان عايز أهاجر. الكلام ده أنا كنت بقوله لبعض الناس من اللي كانت بتيجي تتكلم معايا في الموضوع ده. كنت بقوله انت جاي تفعص في البضاعة. انت معندكش رغبة حقيقية نابعة من أسباب منطقية للهجرة. يعني مثلا من ضمن الناس حد أكون أنا اتكلمت معاه قبل كدة أيام لما كنت لسة في الأول وقاللي انه مش بيفكر في الهجرة وانه ميقدرش يسيب مصر وكدة, وفجأة لما عرف اني مهاجر خلاص اهتم بالموضوع.
أنا كنت عايش على الموضوع ده بس في حياتي. عمري في حياتي ما اديت أهمية لأي حاجة قد اني عايز أمشي. اللي يعرفوني كويس من زمان, يعرفوا اني عقلاني وواقعي وأحب أخطط كويس لأي حاجة وأعمل plan B عشان لو الخطة منجحتش. أول مرة في حياتي يبقى ردي على اللي بيسألني "ايه plan B بتاعتك لو الهجرة منفعتش ؟" اني مهاجر يعني مهاجر. أول مرة ميبقاش عندي plan B.
أول مرة في حياتي مفكرش في ال worst case scenario.
للدرجة دي أنا كنت motivated اني أمشي. أنا كنت "بذاكر" كندا حرفيا. متابع كل الصحف الكندية الكبيرة, وتابعت الانتخابات وقريت عن الأحزاب, والتكوينات العرقية لكندا, والحالة الاقتصادية أخبارها ايه, وكل مقاطعة على حدة اقتصادها عامل ازاي وايه عيوبها ومميزاتها وتكاليف المعيشة فيها ونسبة المهاجرين واللغات اللي بيتكلموها. ده طبعا غير اني كنت بقرأ كل حرف بيتكتب على الانترنت ليه علاقة بالهجرة وقوانين الهجرة. وكنت بدخل في ال forums اللي فيها ناس كنديين بيتكلموا عن كندا أوناس عايزة تهاجر أو ناس وصلت كندا فعلا عشان أحاول أفهم كل حاجة. كل ده أنا كنت بعمله وأنا مش ضامن أي حاجة .... كل ده وكان ممكن معرفش أهاجر.
لو انت قريت لحد هنا ومزهقتش من الرغي اللي فوق, يبقى غالبا انت عندك رغبة حقيقية انك تهاجر ومهتم تعرف التفاصيل :)
************************************************************************************
ملحوظة مهمة 1: أنا مش الحكومة الكندية. أنا بحكي تجربتي واللي نفع معايا. أنا لو مكانك, هتأكد من كل معلومة. الكلام اللي أنا بقوله ساري حتى تاريخ الكتابة 24 أكتوبر 2016. قوانين الهجرة وشروطها بتتغير كل فترة, فلو حد مش هيشتغل على الموضوع علطول, وناوي يأجل 6 شهور مثلا أو سنة, يبقى لازم يراجع كل حاجة.
ملحوظة مهمة 2: مكاتب الهجرة كلها اللي في مصر بتقع تحت بند من اتنين. نصابين, ولو مش نصابين حرامية. حيضرب منك 7 أو 8 آلاف دولار – دي أتعابه غير مصاريف الهجرة – ومش هيعمل أي حاجة انت متقدرش تعملها لوحدك. وال risk كله عليك لوحدك. يعني لو معرفش يسفرك, هيضرب منك ال كام ألف دولار كدة كدة. اللهم بلغت.
ملحوظة مهمة 3: الرجاء الحفاظ على الملكية الفكرية لصاحب المقال عشان تعب فيه قوي والله وكتبه على كذا يوم. شير في الخير لكن بلاش copy و paste.
بسم الله نبدأ.
أنا هكتب هنا التسلسل المنطقي للخطوات اللي أنا شايف انك لازم تعدي بيها عشان ان شاء الله تهاجر. طبعا أنا هنا هشرح الجزء في الهجرة اللي اسمهFederal Skilled Immigration اللي هو هجرة أصحاب الخبرات العملية المطلوبة في كندا. فيه فروع أخرى للهجرة زي هجرة رجال الأعمال أو أصحاب الحرف اليدوية أو ان حد ييجي يدرس هنا مثلا, وكل حاجة وليها شروط مختلفة.
حاجة كمان: الحكومة الكندية بتعمل من سحبتين لثلاثة كل شهر من على السيستم. كل سحبة ممكن عدد الناس اللي فيها يتراوح من 700 مثلا لحد 2000. بعد كل سحبة, الحكومة بتنشر على الموقع بتاعها عدد الناس اللي سحبتهم, وأقل واحد في السحبة دي كان جايب كام. عموما, عشان يبقى عندك تصور, تابع السحب من هنا (ده تاني أفضل موقع بعد موقع الحكومة):
http://www.canadavisa.com/news/latest.html
حاجة كمان للمتزوجين: يستحسن كل واحد فيكم يجرب الخطوات الجاية. لأن الحكومة الكندية بتسمح ان ممكن أي من الزوجين يبقى ال primary applicant والثاني بيبقى secondary. اللي يحدد مين فيكم يبقى primary هو ال score النهائي من 1200. المفروض اللي يجيب أعلى يبقى هو ال primary.
1- أول حاجة, لازم تعرف ال National Occupation Classification code بتاعك ايه. ده كود كدة من أربع أرقام لكل occupation في كندا. كندا بتدي كل شغلانة NOC code و Skill Level/Type. عشان تقدر تيجي تحت ال Federal Skilled Worker وشغلانتك تبقى محسوبة Skilled, لازم تندرج تحت Skill Level 0 أو A أو B. فحضرتك هتدور على الكود بتاع شغلانتك وتتأكد من ال Skill Level بتاعه وتكتب الكود على جنب عشان هتحتاجه في كل حاجة.
الكلام ده ممكن تعرفه أونلاين من هنا:http://www.cic.gc.ca/english/immigrate/skilled/noc.asp
أو تنزل الملف كله من هنا: http://www5.hrsdc.gc.ca/…/2…/pdf/PrintableVersionNOC2011.pdf
2- بعد أما تعرف ال NOC code تشوف انت eligible تقدم في كندا ولا لأ تحت فئة ال Federal Skilled Worker. ده بيبقى points grid من 100 نقطة. أي حد يجيب 67 أو أكثر يبقى eligible. ده ممكن تعرفه من هنا:
http://www.cic.gc.ca/en…/immigrate/skilled/apply-factors.asp
3- طلعت الحمد لله eligible وكل حاجة. المفروض دلوقتي تعمل لنفسك profile على السيستم بتاع الحكومة الكندية, وده اسمه Express Entry profile, وبتاخد تقييم من 1200 نقطة على سيستم اسمه Comprehensive Ranking Systemحسب سنك ومؤهلك وعدد سنين خبرتك ومستواك في الانجليزي أو الفرنساوي – اللغتين الرسميتين لكندا - ومؤهلات زوجتك لو كنت متزوج, وأي خبرة سابقة في كندا.
على السيستم ده,انت بتبقى موجود في ال pool of candidates اللي زيك ومتشاف من الحكومة الكندية ومن المقاطعات الكندية. البروفايل بتاعك ده لسة مش هجرة. ده ماهو إلا إبداء رغبة منك انك عايز تيجي كندا, والسيستم مديك score معين على حسب المؤهلات اللي انت بتدعي انها عندك.
فكر فيها كإنها job vacancy فاتحة في شركة, والشركة قايلة الشروط اللي عايزاها عشان الناس تقدم, وفيه ناس كثير غيرك هتقدم, بس الشركة اللي بتختار في الآخر.
تقدر تعرف انت هتجيب كام من 1200 مقدما قبل أما تعمل profile فعلي على موقع الحكومة. ده ممكن تعرفه من هنا, وزي ما قلت هي دي الحتة المهمة للمتزوجين ان كل واحد يشوف هيجيب فيها كام عشان نحدد مين ال main applicant.
ملحوظة: السؤال المتعلق بمستواك في اللغة هتفترض فيه إجابة لأنك لسة معملتش امتحان يثبت مستواك في اللغة.
http://www.cic.gc.ca/english/express-entry/grid-crs.asp
عرفنا مين ال main applicant الحمد لله. بداية من هنا – الكلام للمتزوجين – ال main applicant بس هو اللي اجباري عليه الخطوات الجاية.
4- كندا ليها لغتين رسميتين: انجليزي وفرنساوي. حضرتك هتمتحن IELTSلو ناوي تختار لغتك الأولى انجليزي, أو تمتحن TEF لو لغتك الأولى فرنساوي.
ملحوظة: ال secondary applicant كمان ممكن يمتحن لو عايزين تعلوا ال score بتاعكوا, لكن مش اجباري.
للناس اللي في مصر, ممكن تحجز IELTS مع ال British Council وممكن تحجز TEF مع المعهد الثقافي الفرنسي.
http://takeielts.britishcouncil.org/
https://institutfrancais-egypte.com/ar/
5- على ما معاد الامتحان ييجي, وبما أن مؤهلك الدراسي من خارج كندا, فهتعمل حاجة كمان اسمها Educational Credential Assessment (ECA). وده كدا شبه إقرار من جهة في كندا بتقول فيه للحكومة مؤهلك الخارجي ده بيساوي ايه في كندا. يعني البكالوريوس بتاعك مثلا – اللي من كلية معينة وجامعة معينة - بيساوي بكالوريوس برضه في كندا ولا أعلى ولا أقل.
ده الحكومة الكندية ادتك الاختيار من بين 3 جهات في كندا المنوط بيها تعمل ال assessment ده:
http://www.wes.org/ca/fswp/
http://www.icascanada.ca/fsw/home.aspx
http://learn.utoronto.ca/…/comparative-education-service-ces
ملحوظة: أنا اخترت أعمل ال assessment مع أول جهة.
6- امتحنت انجليزي أو فرنساوي والنتيجة طلعت, وعملت assessment والنتيجة جاتلك, انت دلوقتي جاهز تعمل Express Entry profile.
ال Express Entry profile ده هتجاوب فيه عن أسئلة كثيرة تخصك وتخص أسرتك ومفيهوش دفع فلوس (انت دفعت في الامتحان وفي ال assessment). ومش هيتطلب منك اثبات دلوقتي على أي حاجة انت هتقولها. وهتاخد score من 1200 زي ما قلت على حسب إجاباتك. البروفايل من هنا: http://www.cic.gc.ca/english/e-services/account.asp#login
7- مليت ال Express Entry profile وعملت submission والحمد لله, تعمل بقى registration مع Job Bank Canada. دي خطوة اجبارية الحكومة بتطلبها عشان انت تبقى متشاف من ال employers في كندا. ال registration من هنا:
http://www.jobbank.gc.ca/home-eng.do?lang=eng
8- انت دلوقتي ممكن تحط ايدك على خدك وتستنى العدل. بس دي أسوأ حاجة ممكن تعملها. لأن العدل مبيجيش لوحده إلا لو انت البروفايل بتاعك سوبر. يعني تكون انت ومراتك مثلا عندكم لغة قوية وانتوا الاتنين جايبين تقديرات عالية جدا في الامتحانات, وانتوا الاتنين عندكم عدد سنين خبرة عملية فظيعة, وانتم الاتنين معاكوا ماجستير أو دكتوراه مثلا. من الآخر, عشان تقف عند الخطوة دي وتستنى الحكومة هي اللي تبعتلك لازم تكون مقفل الامتحان. طب نعمل ايه؟ أصعب خطوة من حيث التركيز المطلوب والسرعة في رد الفعل في الموضوع كله، ال Provincial Nomination.
ليه لازم تدورعلى ال nomination ؟ عشان الحكومة الكندية هتديك 600 نقطة زيادة على أي score انت جبته على ال Comprehensive Ranking System لو نجحت انك تخلي محافظة كندية تعملك ترشيح. ده هيخلي ال score بتاعك ينط فوق قوي فالحكومة تسحبك من ال pool of candidates وتبعتلك Invitation to Apply for Immigration.
طب حد شاطر ودخل يدعبس من ورايا يقوللي طب مش أنا ممكن أجيب 600 نقطة لو جبت job offer برضو ؟ أقوله برافو عليك. بس دي رابع أصعب حاجة بعد الغول والعنقاء والخل الوفي.
نرجع لمرجوعنا, كل مقاطعة ومحافظة في كندا ليها موقع على الانترنت. على الموقع ده, هتلاقي كل محافظة حاطة list بتاعت شغلانات عندها فيها نقص. حضرتك هتدور على شغلانتك على كل موقع من دول وتعرف مين اللي عايزك عنده. بعد أما تعرف انت مطلوب فين بالضبط, تشوف شروط التقديم للمحافظة دي – من على الموقع برضو – وتجهز ورقك بالشكل اللي هيطلبوه, وتستنى يفتحو باب التقديم.
الصعوبة اللي كنت بقول عليها في الحتة دي, انك تعرف بدري أول لما باب التقديم في محافظتك يفتح, وتكون واحد من أول الناس اللي تقدم (لازم يكون ورقك جاهز طبعا).
مواقع المحافظات:
Alberta
http://www.albertacanada.com
Newfoundland & Labrador
http://www.nlpnp.ca
Prince Edward Island
http://www.opportunitiespei.ca
عشان تعرف الأخبار دي أول بأول, تابع المواقع اللي تحت دي كل يوم واشترك في ال mailing lists بتاعتهم عشان يتبعتلك emails عن آخر أخبار الهجرة:
Citizenship & Immigration Canada
http://www.cic.gc.ca/english/index.asp
CanadaVisa Website
http://www.canadavisa.com
CanadaVisa Page (LinkedIn)
https://www.linkedin.com/company/1799035
9- خلصت الخطوة اللي فاتت ولحقت تقدم لمحافظة – أو أكثر – اللي عايزاك. هنا بقى تحط ايدك على خدك وتستنى المحافظة تبعتلك. ممكن يبعتولك ايميل الأول وممكن يبعتولك على ال mailbox بتاع ال Express Entry Profile على سيستم الحكومة علطول. خليك مصحصح. عشان أول أما هيجيلك nomination لازم تعمل accept علطول.
10- بعد أما تعمل accept لل provincial nomination, هتلاقي ال points بتاعتك زادت 600 كمان – مش لازم في نفس اليوم – وبعدها بكام يوم الحكومة الكندية تبعتلك ITA (Invitation to Apply). بعدها هما هيقولولك تعمل ايه خطوة بخطوة.
أنا كدة خلصت :) أنا بذلت المجهود ده من باب "علم ينتفع به" وبتمنى ان أي حد من ملايين الناس اللي عايزة تهاجر يستفيد من الكلام ده في مشواره للهجرة.
*** مكاتب ترجمة معتمدة ***
Middle East Library: 0233351141 (Translation only)
ICU Translation Service: 0233459623 (Translation, Certification, Affidavit & Notary Public)
Deborah Laws & Associates: 0224175844 (Translation - Certification)
الهجرة واللجوء لكندا
هذه معالجة لمحاضرة المهندس اسامة حمودة ، مواطن مصري كندي الجنسية ، عن الهجرة واللجوء الي كندا ، والتي انعقدت في اكتوبر ٢٠١٦ باسطنبول
والمحاضرة تم تسجيلها صوت و هي موجودة هنا
========================================
اولا معلومات بسيطة عن كندا :
من اغني بلاد العالم ، واعلاها في التصنيفات من حيث النمو و الامان و الاقتصاد
مساحتها حوالي ١٠ مليون كيلو متر مربع
عدد سكانها حوالي ٣٣ مليون نسمة
من اعلي بلدان العالم من حيث الحريات و سهولة المعيشة
من افضل بلدان العالم للمهاجرين واللاجئين
تأمين صحي كامل وشامل لكل المهاجرين واللاجئين مثل المواطن الكندي
جنسية كندية بعد ٣ سنوات ، و الباسبور من اقوي الباسبورات في العالم
الموارد في كندا كافية لان يكون عدد سكانها ١٨٠ مليون نسمة ، يعني حوالي ٦ اضعاف العدد الحالي
لكن برضه الحياة مش وردية هناك
درجات الحرارة هناك مفيهاش هزار ، التلج بيبدأ من اكتوبر ، و بيوصل ل ٥٠ تحت الصفر احيانا
مساحتها الشاسعة بتجعل فيه اماكن ضخمة جدا غير مأهولة
فيه نوع من التضخم حاليا في كندا ، والدولار الكندي نزل شوية في السنوات الاخيرة
فيه اماكن مش بتشوف الشمس الا شهور معدودة في السنة
========================================
اولا المهندس اسامة سافر اكتر من ٤٤ دولة في العالم و بيقول ان افضل دولة للسفر هي كندا بلا نقاش
اخذ كورس كامل عن قوانين اللجوء والهجرة علي ايدي محامين متخصين
المصريين مشمولين في قوانين اللجوء لكندا
هنتكلم النهاردة عن حاجتين ، اللجوء ، و الهجرة
اللجوء باختصار انك رايح الدولة بتقول انك مضطهد في بلدك و خايف ترجع لها ، ولو اثبت كدة بيتم قبولك
اما الهجرة معناها باختصار اني عايز اسافر كندا عشان اشتغل هناك و افيد البلد من خبراتي و انا استفيد من الشغل فيها
فاللجوء اهم معيار فيه انك تكون مضطهد ، والهجرة اهم معيار فيه كفائتك و علمك و خبرتك و لغاتك
خلينا نبدأ باللجوء اولا . . .
========================================
ايه انواع اللجوء الي كندا ؟ ؟
فيه ٥ انواع ، ٣ انواع حكومية ، ونوعين غير حكوميين . . .
هو يعني ايه لجوء حكومي و لجوء غير حكومي ؟ ؟
اللجوء الحكومي معناه ، انك هتيجي برعاية الحكومة الكندية نفسها ، او خلالها ، وده ليه مميزات و عيوب ، المميزات متعلقة بالفلوس ، والعيب في طول الوقت
اللجوء الغير حكومي معناه ان جمعية او افراد يجيبوك كندا ، وده ميزته انه سريع جدا و مش محتاج اي شروط ، وعيبه انه ممكن يكلفك شوية
انواعهم اهي :
اللجوء الحكومي :
مفوضية الام المتحدة
دخول كندا و طلب اللجوء
علي الحدود بشرط وجود قريب كندي
اللجوء الغير حكومي :
الجمعيات العرقية والدينية
الخمس افراد
وهنشرح هنا بالتفصيل نوع نوع
========================================
١ ) مفوضية الامم المتحدة ( لجوء حكومي )
وهي المنوطة بالبحث عن اللاجئين و توزيعهم علي الدول علي مستوي العالم
بس المشكلة الاساسية هي الطابور الطوييييييييل اللي منتظرك لو قدمت من خلاله . .
ده غير ان المفوضية اساسا مش هتعترف بيك كلاجئ الا لو كان عليك حاجة خطيرة لدرجة مفزعة انك ترجع بلدك . .
يعني مثلا حكم بالاعدام و مصدق عليه ، وهكذا . .
لدرجة ان المفوضية لا تعتبر جميع السوريين في تركيا لاجئين ، و اعرف سوريين حاولو يسجلو فيها و اترفضو ، قالو انتو عايشين هنا مستريحين فليه تسافرو اصلا
فلو حد اتقبل فيها ، بتيجي طيارة مخصوص من كندا تاخدهم من البلد اللي هما فيها ، و هناك اول ما يوصل يتم تسكينه ، و ياخد مرتب تقريبا ١٥٠٠ دولار كندي شهريا لمدة سنة
و بعد سنة من دخول اللاجئ بيحصل علي وثيقة سفر و ممكن يسافر بيها اماكن كتير
و بعد ٣ سنين من دخوله بيحصل علي الجنسية الكندية
طيب سيبك من ده و ادخل علي اللي بعده
========================================
٢ ) دخول كندا ( لجوء حكومي )
المقصود بيها انك لو عرفت تحط رجلك في اراضي كندية ، ساعتها ممكن تطلب لجوء سياسي فورا ، بس لشرط ، تثبت انك مضطهد في بلدك و مش قادر ترجعلها . .
طيب نيجي علي اول جزئية ، ازاي اصلا ندخل كندا ؟ ؟
الحقيقة جميع فيز كندا صعبة مش سهلة ، و اعرف ناس معاهم شنجن و امريكا سارية و اترفضو في كندا . .
بس الموضوع مش مستحيل ، وهنا فيه بوست كامل عن كيفية اخذ التاشيرة الشنجن و امريكا و كندا
بس مبدئيا ، ان مكانش معاك ٥ تاشيرات شنجن علي الاقل و حساب بنكي كبير ، متقدمش سياحة
طب هل ينفع دراسة ؟ ؟
الحقيقة ان تاشيرة الدراسة ممكن تكون اسهل شوية ، متوسط سعر الجامعات في كندا من ٨ الي ١٦ الف دولار امريكي ، و اغلبها بالانجليزي ، و بعضها بالفرنسي
كندا فيها حوالي ٣٣ جامعة ، فلو انت راسلتهم علي النت و جبت قبول في اي جامعة ، و دفعت رسوم الترم الاول علي الاقل ، وكان معاك كشف حساب يثبت ان معاك رسوم السنة الاولي علي الاقل ، ممكن تاخد فيزا دراسة . .
طيب اخدت فيزا سياحة او زيارة ، و بعدين ؟ ؟
ساعتها اول ما تنزل البلد ، و خلال اسبوع بالكتير تشوف محامي لجوء ، و تقدم علي لجوء فورا
رسوم المحامي بتكون حوالي الفين دولار امريكي ، وخلال شهرين من تقديمك علي اللجوء ، بتقعد مع موظف حكومي يستلم منك الاوراق اللي تثبت انك مضطهد في بلدك
وبعد ٤ شهور كمان ( يعني بعد ٦ شهور من دخولك البلد ) بتقعد مع القاضي ، اللي بيشوف ورقك ويحدد انت مقبول ولا مرفوض
نسبة ٩٨ ٪ تقريبا بيتم قبولهم ، ولا يتم رفض الا اللي بيغش او يزور ورقه . .
لو تم اترفضت ، هيحصل ايه ؟ ؟
هيتم تسفيرك لبلد تكون امان ليك ( تركيا مثلا او ماليزيا ) ، و مش هيرحلوك مصر
طب لو اتقبلت ؟ ؟
ساعتها بيطلعلك حاجة اسمها بي ار
PR
اللي هي زي الجرين كارد الامريكي ، و بتعامل كلاجئ تماما و يكون ليك تامين صحي كامل ، و بتاخد مرتب شهري تقريبا ٧٥٠ دولار امريكي لمدة سنة ، و بعد ٣ سنين الجنسية
كمان اول ما يتم قبول لجوئك ( اللي هي جلسة القاضي ) ممكن تعمل لم شمل لزوجتك واولادك اللي اقل من ١٩ سنة ، اي طفل ليك اكبر من ١٩ سنة مينفعش ، كمان مفيش لم شمل للوالدين او الاخوة
ولم الشمل بياخد من شهرين ل ٦ شهور ، و ساعتها بياخدو الفيزا من البلد اللي فيها و ييجو علي كندا و يمرو بنفس الخطوات
فكل الكلام ده لو انت عرفت تدخل كندا ، سواء بفيزا سياحة او دراسة او غيرها
فيه ناس كانو زمان بيعملو فكرة و انهم يجيبو تاشيرة دولة تعبانة ( المكسيك مثلا ) و يسافر من اسطنبول للمكسيك ترانزيت كندا ، وييجي في المطار يطلب لجوء . .
بس للاسف ده مستحيل حاليا ، لان انت اصلا مش هتركب اي طيارة متجه لكندا الا لو كان معاك فيزتها ، و مستحيل الظابط يقتنع انك رايح المكسيك ، ومهما تحاول مش هيقتنع و هيقولك ملناش فيه
ديه الطريقة التانية ، ايه التالتة ؟ ؟
========================================
٣ ) علي الحدود ( لجوء حكومي )
هي طريقة محدودة جدا لان لها شرط اساسي ان يكون ليك قريب كندي ( حتي من الدرجة الرابعة ) ، وفي نفس الوقت يكون معاك فيزا امريكا ، فان مكانش معاك الاتنين دول نط علي الطريقة الرابعة . . .
الطريقة بتقول ان لو عندك قريب كندي ، و معاك فيزا امريكا ، ساعتها ممكن من امريكا تروح علي الحدود البرية الكندية الامريكية ، و تقول عايز اعمل لجوء عندكو ، و قريبي تليفونه كذا ، هيتصلو بيه ويجيبوه ، وخلال اسبوع بالكتير تدخل البلد و تعمل لجوء كامل
سيبك منها و ادخل علي اللي بعده
========================================
٤ ) لجوء الجمعيات ( لجوء غير حكومي )
من سنين طويلة كندا عملت قانون اسمه "ساه SAH" واللي بيسمح لاي جمعية دينية او عرقية انها تعمل استقدام اي حد من اي دولة في العالم و من غير اي شروط خاصة ( يعني مش لازم يكون مضطهد ولا كفاءة معينة )
بس الشرط الاساسي ان الدولة مش هتتكفل بيه ماديا ، مش هتديله مرتب ، وان لازم الجمعية ديه هي اللي تتكفل بيه
عشان كدة الدولة بتشترط علي الجمعية انها تضع مبلغ من المال في البنك عشان يتم التقديم لاستقدامه ، و اول ما يوصل ، البنك بيصرف كل شهر جزء من المبلغ ده للاجئ عشان يعيش منه
يعني المبلغ اللي هيتحط في البنك مش هيضيع ، لكن هيتم صرفه علي مدار سنة كاملة و يستمله اللاجئ نفسه ، عشان ميطلبش من الدولة اي مرتب او اعانة
اشهر الجمعيات اللي بتقوم بالدور ده هي الكنائس ، فهي مشهورة علي النت باسم اللجوء الكنسي
طب هل ينفع الكنيسة انها تستقدم مسلمين ؟ ؟
الحقيقة انهم فتحو باب الاستثناء للسوريين والعراقيين والفلسطينيين ، فممكن يتم استقدامهم عن طريق الكنيسة ، او لو مصري بس معاه قضية اعدام مثلا
والمؤسف ان مفيش اي جمعية اسلامية بتعمل الموضوع ده ، مع ان القانون مرخص لها نفس الخدمة ، بس مفيش اي جمعية اسلامية خدت دور حتي الان في الموضوع ده
طب المبلغ كام ؟ ؟
بيتفاوت حسب كام فرد
فلو فرد واحد هيتم استقدامه بيكون المبلغ حوالي ٨ الاف دولار امريكي
لو فردين بيكون حوالي ١٥ الف
لو ٣ حوالي ١٨ الف
و زي ما قلنا ، الفلوس مش بتضيع ، لكن اللاجئ بيسحب منها شهريا لغاية لما ياخدها كلها خلال سنة
وبالمقابل اللاجئ اللي بيجي ، ميطلبش اي مرتب من الحكومة ، بس ليه باقي الخدمات كلها ، تامين صحي مجاني ، اقامة دائمة ، و تصريح بالعمل ، جنسية بعد ٣ سنين
طب ايه اللي هيخلي جمعية ولا كنيسة تجيبني انا ؟ ؟
الحقيقة ان ممكن يكون فيه جمعيات توافق علي استقدامك ، بس هما بيقولو لحضرتك ، ابعتلنا الفلوس اللي هنحطها في البنك باسمك و انت هتاخدها كل شهر ، زائد احيانا بيطلبو تبرع للكنيسة او الجمعية ( و ده ليه حكم شرعي محتاج متخصص )
واول ما بيقدمو باسمك ، الموضوع هياخدله كام شهر ، و تعمل مقابلة في السفارة ، ولو معندكش سجل اجرامي بتاخد الفيزا
فالموضوع ممكن يتلم بمثلا ١٠ الاف دولار ، ٨ للكفالة زائد الفين اي مصاريف هنا و هناك
ولو مش معاك فلوس عشان اسرتك اكبر ( انتو لو ٤ افراد هتحتاج حوالي ٢٠ الف دولار ) ، فممكن يتم عمل التقديم لرب الاسرة بس ( ب ٨ الاف ) و هو يروح و اول ما يتقبل لجوء يعمل لم شمل لمراته و اولاده مجانا ، بس طبعا الموضوع هيدخله في سنة مثلا علي ما ييجو
وفيه شركات سماسرة و بيجيبولك كنائس او جمعيات تعمل لجوء و بياخدو اتعاب
وهنا فيه تفاصيل اكتر عن الموضوع ده
========================================
٥ ) الخمس افراد ( لجوء غير حكومي )
وهي مشابهة كتير للنوع اللي فوق ، بس الفرق ان اللي بيعمل طلب استقدام مش جمعية ولا كنيسة ، لكن اي ٥ مواطنين كنديين
القانون بيقول ان اي خمس مواطنين كنديين لو راحو و طلبو من الحكومة استقدام فلان الفلاني من اي مكان في العالم ، الحكومة بتوافق و بياخد فيزا لاجئ فورا ، بس بشرطين :
انهم يحطو في البنك مبلغ الكفالة ليه ، واللي برضه اللاجئ بيسحبه شهريا لغاية لما يستمله كله خلال سنة
انه يكون معاه ورقة من مفوضية الام المتحدة انه لاجئ ، يعني يكون متسجل عندهم ، بس يستثني من الشرط ده السوريين والفلسطينيين
يعني ممكن طلب اي سوري او فلسطيني علي مستوي العالم ، بس طلب اي جنسية تانية ( مصري مثلا ) لازم يكون اسمه متسجل كلاجئ في اي بلد ( زي تركيا )
========================================
ديه كدة اهم انواع اللجوء لكندا . . .
طب احنا نعمل ايه ؟ وانهي افضل طريقة ؟ ؟
اولا انسي انك تعمل اي طريقة و انت في مصر ، لان من ناحية مستحيل تاخد فيزا لاجئ و انت في مصر ، و من ناحية الفيزا السياحية او الدراسية شديدة الصعوبة و انت هناك
تعالي بلد تقدر تعمل فيها اقامة و تقدم منها ، و افضلهم تركيا
طب اللي في تركيا يعملو ايه ؟ ؟
ان مكانش معاك مبلغ ١٠ الاف دولار مبدئيا ، فهيكون صعب كتير تعمل اي نوع من اللي فاتو دول للاسف
لو معاك المبلغ ، فافضل الحلول فيزا طالب ، لو راسلت جامعات كندية و قدمت ان مؤهلاتك كذا كذا ، واني مستعد ادفع رسوم الترم الاول ، ممكن تجيلك موافقة مبدئية ، وتدفع رسوم الترم الاول ، و بعدها تاخد الفيزا ، واول ما تروح قدم علي لجوء ، و اعمل استقدام لاسرتك . .
ولو انت اقنعت القاضي ان حالتك المادية ضعيفة ، ممكن يقرر ان الحكومة تدفعلك الفلوس اللي انت دفعتها في الجامعة ( بس الاحتمال مش كبير )
طب ده منفعش ؟ ؟
حاول تشوف تاشيرة كندا سياحة بالشروط اللي قلناها
منفعتش برضه ؟ ؟
يبقي شوف ازاي ممكن تسجل اسمك في تركيا كلاجئ ( الحقيقة مش عارف الخطوات و ايه اللي يتعمل ) ، و اجري علي النوع الخامس ( خمس مواطنين كنديين ) وشوف مين يقدر يوصلك بيهم ، و تبعتلهم الفلوس عشان يحطوها في البنك باسمك و تاخد الفيزا و تطير
و نصيحة . . .
كل اساليب الفهلوة وضرب الورق والخداع اللي بتجري في دم كتير من المصريين للاسف مش بتاكل معاهم ، الكنديين فهمونا كويس ، و مش بيطيقو ريحة الكدب ، واول ما يكتشفو كدبة واحدة بس هيتم رفض لجوءك فورا . . .
ففكرة انك تعمل باسبور سوري ، او تضرب لك حكم اعدام من مصر ، او فوتوشوب اسمك في جرنان ، كل ده فاكس ، و احتمال يقعدوك مع مصريين هناك هارشينك كويس
طب انا لا معايا فلوس ولا عارف اتسجل كلاجئ ولا اعرف كنديين ؟ ؟ ؟
يبقي سيبك من اللجوء خالص ، وركز معايا يا بوب في الهجرة ، بس هتتعب معايا شوية في المذاكرة
========================================
يعني ايه هجرة ؟ ؟ ؟
يعني انت راجل كفؤ ، مؤهلاتك عالية و امكانياتك كبيرة ، وبتحاول تقنع كندا انك علي قدر من الكفاءة انك تكون جزء من الدولة العملاقة ديه . . .
زي ما قلنا ان موارد كندا اكبر بكتير من تصورنا ، وان مساحات شاسعة في اراضيها مستنية اللي يزرعها ، و ان الاف المصانع محتاجة الاف الايدي العاملة ، و ان الدولة محتاجة يكون سكانها ١٨٠ مليون نسمة عشان تتناسب مع مواردها . . . .
بس الحكومة هناك ذكية ، مش عايزة تجيب "انفار" يملو البلد و يقعدو من غير شغل ولا مشغلة ، مش عايزة تجيب ناس متعرفش تتكلم لغتها . . .
الحكومة عاملة فلتر قاسي شوية في معايير اختيار المهاجرين ، فلو انت فعلا قدرتك عالية هيقولولك تعالي و يستقبلوك بالاحضان ، وهتلاقي الشغل مستنيك و بعد ٣ سنين تضرب الباسبور الكندي الازرق في جيبك ، و تبقي مواطن كندي قد الدنيا
والجميل ان مفيش وسايط ولا محسوبية و لا كرمشة فلوس في الحوار ده ، علي قد قدراتك و مواهبك هيتم اختيارك ، و لو متمش اختيارك اعرف ان العيب في حضرتك مش حد تاني
طب لو قدراتك ومؤهلاتك قليلة ؟ ؟ مفيش مشكلة ، نميها واتعلم لغة و خد كورسات و قدم تاني و ممكن تتقبل
انت بقي مش عايز تذاكر و تتعلم لغة و تطور نفسك ، يبقي خليك في بيتكو او ممكن تهاجر علي مدغشقر ، هناك الحياة هايلة جدا
========================================
طب اهاجر ازاي ؟ ؟
الحقيقة زمان كان نظام الهجرة معقد شوية ، بس حاليا سهلو الدنيا كتير و خلو كل حاجة متعلقة بكندا في موقع واحد بس هو
الموقع محتاج من حضرتك سبع تمان كبايات نيسكافيه و سهرة و هتلاقي الدنيا متقسمة بشكل كويس جدا
اول لينك محتاج تزوره هو ده
وهو فيه مجموعة من المعايير بيحدد علي اساس اجاباتك ، هل انت مؤهل انك تيجي كندا كمهاجر ولا لأ
واغلب الاسئلة بتكون علي اساس :
جايب كام في الايلتس ( الانجليزي )
جايب كام في التيف ( فرنسي )
معاك كام شهادة ؟
معاك خبرة حقيقية قد ايه ( متفكرش تضرب ورق لان هيمتحنوك متخصصين )
معاك فلوس قد ايه ( مش لازم تكون غني بس متكونش متسول )
سنك كام ؟ ( السن الاصغر فرص اعلي )

ادخل حالا علي الموقع وشوف انت مؤهل ولا لا
لو قالك ايوة انت مؤهل ، يبقي نبدأ نشوف الخطوات بالتفصيل
لو لأ ( و ده اغلبنا للاسف ) ، فالموقع مش هيقولك تعالي اختبر نفسك تاني امتي ، هو هيسيبك لغاية لما حضرتك تكون جاهز
========================================
طب اعمل ايه اول خطوة ؟ ؟
ادخل شوف نفسك مؤهل ولا لأ ، ولو مش مؤهل زود نقطك
ازودها ازاي ؟ ؟
ان اولا حصولك علي عرض عمل حقيقي من كندا بيزود كتير من فرص قبولك .
و الشركات في كندا محتاجة فعلا ايدي عاملة ، بس مش هيجيبو اي حد وخلاص
فانت السي في بتاعك و انجازاتك الحقيقية لو تغري انها تخلي شركة كندية انها تقبلك فيبقي هايل
كمان تزود درجات الايلتس و التيف ، و الاتنين محتاجين من حضرتك مذاكرة شديدة
و يا سلام انك تاخد كام شهادة اضافية لشهادتك ، حاجة زي الام بي ايه هتبقي مطلوبة جدا
كندا فيها اكتر من ٦٣ نوع من الهجرة ، بس كلهم بيشتركو ان الشخص ده يكون جاهز يشتغل ، مش هنعلمه من الاول
فيه شركات في كندا و دبي متخصصة في المساعدة في اوراق الهجرة ، يجيبولك فرص عمل حقيقية او قبول في جامعات (عشان هجرة الطالب ) او يختارولك نوع الهجرة المناسب ، بس كلها برضة معتمدة علي قدراتك انت
كمان ولايات كندا ال ١٢ ، بيعملو برامج هجرة داخلية ليهم . لو انت قبلت في اي برنامج منهم تسافر فورا
و كل الحاجات ديه موجودة علي الموقع اللي قلناه فوق


----------ECA ----Educational Credential Assessment ------------
-----------------------------www.wes.org ----------------------------
-----------دي معادلة شهادة لاي شهادة حصلت عليها من خارج كندااااا-----------------------
س / الموقع Wes اختار ايه طلبة ولا هجرة ولاتعليم 
ج / هجرة 
-----------
س / و ضع الاطباء و الصيادلة وهل ليم امتحان ..
ج / انامش دكتور و لاصيدلي - المعلومات اللي عندي -ان في فرق بين الحصول على شهادة مزاولة مهنه هناك و دي بيتطلب لها امتحان علشان تروح دكتور او صيدلي و دجي ممكن تتعمل هناك -- و فرق اخر انك تعادل الشهادة بتاعتك كبكالريوس طب كشهادة عليا علشان تحصل علي 21 نقطة من اصل 67 علشان تعرف تدخل الpool 
الموقع بتاع wes فيه ردود على اسئلتكم ادخلوا عليه و اعرفوا التفاصيل 
---------------
س/ بالنسبة للماجيستيراو الدكتوراة 
ج / كل شهادة تلغي ما قبلها - لعني لو ماجستير -يبك من البكالريوس - لو دكتوراة سيبك من الماجيستير 
-------------------------------------------
س / طب بالنسبه للمؤهل المتوسط دبلوم تجارى مثلا
ج / كله بيتعادل لو موجود متسجل داخل الموقع بتاع WES بس طبعا هتنقص نقاط في الاجمالي بتاعة المؤهل ولازم تعوض الفرق في حاجات تانية مثالا درجة اللغة 
------------------
س / لازم موضوع الجامعه ده انا في السعوديه ومعايا الورق بالفعل. ماينفعش ابعته بنفسي علي العنوان؟
ج / للاسف لاء لان دي شروط المنظمة بتاعة WES 
--------------------
س / دا بالنسبة للناس اللى عايزة تدرس هناك بس ولا ينفع اللى عايزين يشتغلوا بردو؟
ج / انا مجبتش سيرة الدراسة - الدراسة هي هي بس لازم شهادة الايلتس تبقي اكاديمك مش جينيرال 
----------------
س / مفيش موضوع اساسا ليه معادله هو انتى راحه على شغل معين وعاوز شهاده واجراءات الهجره ملهاش علاقه بالى هو بيقوله ادخلى موقع السفاره وافهمى المطلوب ولما فيه موقع بيعمل معادله لكل الشهادات السفاره هتعتمده ومش هتعتمد الجامعه دى اشتغاله..!
ج / يا استاذة انا والله مش هستفيد حاجة لما اشتغل الناس - ولو حضرتك تعبتي نفسك خمس دقايق فقط كنوع من الثقافة العامة ادخلي على الموقع و اقراي اللى عليه و ادخلي على السفارة اللى حضرتك بتنصحي بيها و اقراي اللى عليه و ادخلي علي شروط الهجرة و انتي هتبقي مثقفة اكتر من اي حد قوي والله 
-المعادلة لاثبات انك مؤهل عالي للحصول على 21 نقطة كاملين 
---------------
س / دخلت و قريت التقديم في الاكسبرس انتري لازم حاجة اسمها educational certificate assesment
في حاجة اسمها Express Entry ولازم تعمل معادله لشهادتك لو عايز تشتغل بنفس مؤهلك، لو عايز تروح تبيع بيتزا مش لازم تعملها
ج / جزاكي الله خير انك رديتي غيبتي - بس حتي لو هيبيع بيتزا لازم يعادل الشهادة علشان يحصل على النقاط 
-----------------------
س / معلش سؤال لو انا مش هشتغل فى التخصص بتاع شهادتى مش محتاجه معادله صح؟
ج / غلط - هتثبتي اواي انك مؤهل عالي و تحصلي علي 21 نقطة من اصل 67
---------------------------
س/ ليه نسختين او ثلاثة د شكلة استهبال ؟
ج / حضرتك والله ابدا - انا كبرت على الاستهبال - الجامعة هترفض تعتمد صور للشهادات حتي لو wes طالب كدا - فلازم تبعتي الاصل و علشان كدا قولنا تعملي نسختين او ثلاثة -علشان بعد ما ربنا يسهلك و تيجي الدعوة لازم تبعتي كل اصول مستنداتك خلال 60 يوم - هتجيبي منين بقي نسخة اصل تاني ؟ روحي بقي قوليلهم انا كنت فكراه بيستهبل و عاوز نسخة تانية - وابدأي من جديد و لو عدي 60 يوم و مقدمتيش الورق - تعيدي كله من الاول تاني حضرتك 
-------------------------------------------------
س / ممكن نعمل المعادلة بعد السفر؟
ج / هتسافر ازاي اصلا - لو تعرف تسافر سافر و كبر دماغك من الوش دا كله 
-------------------
س / استاذ تامر دلوقتي انا اشتغلت سنتين في مؤسسة حكومية وخدت شهادة خبرة بس بالعربي اترجمها فمكتب معتمد ولا اعمل شهادة خبرة بالانجليزي واخليهم يعتمدوهالي من الامؤسسة دي؟
ج / الاتنين يمشوا عادي 
---------------------------
س / انت لومش خريج كليه بس عمالة ماهرة زي السباكة والميكانيكي دول فرصهم كبيرة بره لاي دولة؟
ج / صح لو تعرف تثبتها و تعتمدها ودول مطلوبين اكتر من الخريجين 
------------------------------
س / طيب السن لغاية كام والناس المتخرجة من زمان وشغالة؟
ج / لحد 32 سنة بتاخد نقاط العمر كاملة - كل ما تزيد النقاط بتقل ولازم تعوض الفرق في حاجات تانية 
------------------------
س / هل المحاسبين ليهم معادلة ؟
ج / كل المؤهلات العليا ليها معادلة 
---------------------------------------
س / معلش حضرتك تعرف مكتب اللي ممكن اتعامل معاه،بيقدملي في وظائف من قبل ما اروح كندا؟
ج / في مكاتب بس هياخدو فلوس كتير قوي قوي و في الاخر لازم تعملي كل الورق المطلوب هو هو - المواقع كتير جدا جدا - ولو حصلتي على عرض وظيفي دا يرفع درجاتك فورا 
------------------------------------------------------------------------------------------
س / يعني ايه هجرة ؟
س / يعني انت راجل كفؤ ، مؤهلاتك عالية و امكانياتك كبيرة ، وبتحاول تقنع كندا انك علي قدر من الكفاءة انك تكون جزء من الدولة 
-------------------
س / في عنصرية هناك 
ج /لا لان اغلبها مهاجرين 
-------------------------------
س / سؤال بعد اذنك ، انا هندسه القاهره و اللي اعرفه انها مش محتاجه معادلات الكلام ده صح و لا غلط
ج / غلط اقرا اللي فوق كله و انت تفهم 
----------------------------------------
س/ البرد هناك عامل ايه ؟
ج / شرس جدا - بس كله بالتعود و الناس مش ماشية عريانة 
---------------------
كندا فيها اكتر من ٦٣ نوع من الهجرة ، 
ولايات كندا ال ١٢ ، بيعملو برامج هجرة داخلية ليهم
--------------------------------
س / الزوجين يعملوا ؟
ج / مقدم الطلب لازم يعمل - الزوج او الزوجة في اتقديم للحكومة مش محتاج لكن هيحتاجها بعد كدا في الدرجات الفرعية و لو ربنا سهل و سافرت و فكرت تشتغل هناك هتحتاجها -لكن في النهاية ممكن متعملهاش 
------------------------------------
س / التويفل ام الايلتس؟
ج / التويفل غير مطلوب لانه بيتضرب دلوقتي و هم عارفين كدا - ايلتس فقط 
----------------------------------------------------------------------------------
اتعبوا شوية و ادخلوا شوفو الموقع و اعرفوا التفاصيل اللي عليه 
يا رب اكون جاوبت على اغلب اهم الاسئلة 
ارجوكم الاسئلة على الخاص يفضل تكون هنا علشان الناس تستفيد 
قضيت اليوم كله امس برد على اسئلة على الخاص 
انا مش متضايق والله بس خلي المنفعة عامة 
هجهز البوست بتاع الخطوه التانية 
اشكركم

ليست هناك تعليقات:

إرسال تعليق

الاشتراك في: الرسائل (Atom)