تايلاند

 تايلاند

1- جواز سفر ساري

2- عدد 2 صورة شخصيه حديثه

3- كشف حساب بنكي

4- سجل تجاري وبطاقه ضريبيه لاصحاب الاعمال

    او خطاب من جهه العمل للموظفين

    او شهاده قيد من الجامعه للطلبه

6- حجز فندق وحجز طيران

7- نموذج السفاره

مده الحصول عالتأشيرة من 5 يوم – 10 يوم ،، لا يتم اجراء مقابله شخصيه

العنوان: Villa No.19, Abdallah El-Kateb Street,, Ad Doqi, Giza Governorate

الهاتف: 02 33367005 

هتكلم عن استخراج الفيزا لتايلاند سياحة وهتعمل كل الورق بنفسك من غير شركة سياحة، يلا نتكلم في المهم علي طول

الدولة: جمهورية تايلاند

مكان السفارة: 19 شارع هنداوي (اسم اخر للشارع شارع الكاتب)، الدقي، القاهرة، بجانب مستشفي الكاتب

مواعيد تسليم الورق: من 9:30 الي 11:30 صباحا

مواعيد الاستلام: من 3:00 الي 4:00 عصرا

الموقع وتفاصيل الورق والتقديم: فيزا تايلاند

التكلفة: 300 جنية للدخلة الواحدة ممكن تقدم علي فيزا دخلتين او دوبل انتري

الاوراق المطلوبة:

• 1- الباسبور يكون متاح ل 6 شهور وصورة من اول صفحة
• 2- صورة شخصية حديثة 4×6 وياريت تكون فعلا حديثة عشان بيدققوا
• 3- طلب الحصول علي فيزا، تلاقيه اونلاين من جوجل ( طلب فيزا تايلاند ) 
• 4- حجز اوتيل
• 5- حجز طيران مبدئي
• 6- كشف حساب من البنك فيه اكتر من 10 الاف مصري
• 7- خطاب من جهة العمل اوسجل تجاري وبطاقة ضريبية مترجمة للانجليزية

التحضير:

كل الاوراق معروف طريقتها بس انا هتكلم ازاي تجيب حجز طيران مبدئي وحجز اوتيل مبدئي من غير ما تدفع ولا مليم

1- حجز الطيران المبدئي ودة انا دورت فيه كتير جدا وكل الناس قالت ان لازم شركة سياحة هي اللي تعمله، لاكن الكلام دة مش علينا، من انهاردة مافيش شركة السياحة ، انت شركة السياحة.
بص يا سيدي هو اصلا يعني ايه حجز مبدئي؟ يعني حجز موجود علي سيستم الطيران باسمك ولاكن غير مدفوع وبالتالي بيبقي ليه فترة معينة وبينتهي او الحجز بيتلغي، ماتقلقش سفارة تايلاند مش بتزعل لو الحجز اتلغي لاكن بتزعل لما تدرب حجز وهمي ويطلع ان مافيش اصلا طيارة بتروح تايلاند بالبيانات اللي انت مقدمها، يعني مش كدة يا جماعة. المهم بعد البحث والتمحيص لاقيت ان موقع ترافل استارت بيسمحلك تعمل حجز لطيف باسمك كالاتي، هتدخل علي الموقع بعد كده هتكتب من مطار القاهرة (CAI) الي مطار بانجكوك (BKK) وطبعا تختار المواعيد خلي بالك ان المواعيد دي هي اللي هتاخد الفيزا علي اساسها يعني بحبح شوية مثلا لو هتعد اسبوعين اختار 20 يوم، بعد كدة تختار الطيارة او الرحلة وتكمل في الحجز فا هيطلب اسمك برضه خلي بالك تكتب اسمك زي الباسبور بالظبط وبعد كدة تيجي بقي ل اخر خطوة الدفع، احنا مابندفعش، تختار في وسائل الدفع انك هتدفع في حساب الشركة في البنك وتكمل عادي، هيطلعلك شكل الحجز النهائي وفي اتاحة للطباعة تطبع الحجز وكمان هيبعته علي الايميل بتاعك فا ممكن تطبعه في اي مكتب لو مش عندك برينتر. وبكدة بقي معاك حجز طيران مبدئي ساري لمدة 24 ساعة فقط، طبعا لو مادفعتش هيتلغي.

2- حجز الاوتيل هتجيبة من موقع بوكينج  وده موقع لحجز الاوتيلات في جميع انحاء العالم هنكتب في السيرش بانجكوك عاصمة تايلاند وهنختار اوتيل 3 ستار يكون سعره معقول بس المهم يكون مكتوب انه الالغاء مجاني او Free Cancellation عشان ممكن نلغي الاوتيل بعد ما ناخد الفيزا، حاجة تاني الموقع مش بيسحب فلوس وكله مجاني بعد كدة هتختار الغرف وتكتب بياناتك بنفس الاسم المكتوب في الباسبور بالظبط بعد كده ندوس علي حجز الان او بووك ناو في الاخر هيطلع تاكيد الحجز او بووكينج كونفيرميشن وهي دي الورقة اللي محتاجين نطبعها ، هما بيبعتوا نسخه علي الايميل فا ممكن لو ماعندكش برينتر تنزل اي مكتبة او مكتب تصوير تطبعها هناك.

طبعا خطاب العمل يكون مكتوب فيه نفس المواعيد اللي موجودة في حجز الطيران والاوتيل وطبعا هي نفس المواعيد اللي هنكتبها في طلب التاشيرة، حاجة تاني كشف الحساب يحبز يكون بالانجليزي والاسم يكون مكتوب زي الباسبور.

كدة ورقك كله في السليم نطلع بقي علي السفارة.

التقديم:

الميزة ان سفارة تايلاند مش بتجبرك تاخد معاد مسبق يعني تاخد نفسك وتروح علي طول، انصحك تكون الساعة 9:00 الصبح هناك وانصحك تروح مواصلات او بتاكسي لان لو معاك عربية مش هتعرف تركن وتستني لما يفتحوا الباب للمواطنين وخد بالك انهم بيدخلو المواطنين من الباب الجانبي مش الباب الرئيسي، هيقابلك شاب مصري زي العسل هيشوف ورقك ويتاكد انك مليت الابلكيشن الجديد ويرتب الورق ويديك ورقة فيها الاوراق المطلوبة مكتوبة كل اللي عليك انك تعلم علي كل خانة انها موجودة يعني مثلا مكتوب حجز طيران تعلم جنب خانة موجود وهكذا بعد كدة نفس الشاب هيكتبلك رقم بالقلم علي ورقك وهيدبسلك الصورة في الابلكيشن ويقولك قدم الورق علي الشباك.

اول ما تدخل تروح علي الشباك علي طول تقدم الورق وتحفظ رقمك كويس خلي بالك السفارة بتبقي زحمة مصر كلها رايحة تايلاند بس انت ماتعرفش بس، بس خلاص  هتقعد تستني لما يندهو رقمك هما جوه بيراجعوا طلب طلب وبيشوفو الورق كويس، هيتنده رقمك لو في مشكلة في الورق لا قدر الله او لما يراجعوا ورقك ويلاقي كله تمام تروح علي الشباك تدفع 300 جنية زي الباشا وتاخد الايصال بتاع الاستلام.

الموضوع بياخد يومين بالظبط يعني لو قدمت انهاردة تستلم بعد بكرة من الساعة 3 الي الساعة 4 في نفس المكان، ومبروك يا كبيير

شوية حالات خاصة:

1- لو اتنين طالعين شهر العسل بيطلبو عقد جواز او عقد خطوبة (نص اكليل) وطبعا بيكون مترجم للانجليزي

2- لو الصورة مش حديثة بيرفضوها (واحد كان جايب نفس الصورة اللي في الباسبور) والباسبور معمول سنة 2012 فا رفضو وطلبوا صورة حديثة

3- لو حساب البنك فيه اقل من 10 الاف بيرفضوا لو كشف الحساب شهادات بيرفضوا عاوزين حساب جاري او توفير

4- لو في طفل مسافر بيتعامل نفس معاملة الكبار ولاكن بيتحط صورة كشف حساب الاب مع طلب الطفل

5- لو اتنين هيسافرا شهر عسل ومش هيعرفوا يجيبوا عقد يبقي كل واحد هيقدم سينجل وبالتالي كل واحد يجيب كشف حساب وخطاب من جهة العمل

6- لو متجوزين ومكتوب اسم الزوج في باسبور الزوجة ممكن يكتفي بكشف حساب الزوج فقط بس يكون فيه اكثر من 30 الف جنية وطبعا يكتفي بخطاب عمل الزوج فقط

7- روح بدري عشان لو احتاجت تترجم حاجة او تصور حاجة تلحق تقدم في نفس اليوم