بالنسبة لموضوع الاقامة السياحية للناس اللي ماشية في اجراءاتها او عايزة تعملها اليومين دول في اسطنبول.. انا لسه مخلص كل حاجه النهارده في الأمنيات و هستلم الاقامه بعد ١٥ يوم ان شاء الله زي ما قالوا..
الكلام للمصريين فقط - كل جنسية ليها متطلبات خاصة بيها - الكلام للي في تركيا لوحده - الكلام مش للي تحت ال ١٨ سنة عشان بيطلبوا منهم حاجات زيادة - ضروري تقرا البوست المثبت و تشوف اللينك الخاص بالاقامات السياحية.
اللي احتاجوه كالتالي (مهم: التجربة شخصية شخصية شخصية بتاريخ ٢٧ ديسمبر ٢٠١٦):
- ابلكيشن موعد التقديم وده بتعمله من ع الموقع (راجع البوست المثبت).
٢- صورتين من جواز السفر (مترجم او مش مترجم).
٣. صورة من تأشيرة دخول تركيا و عليها الختم (لو ختم الدخول في الخلف صور الخلفية بردو).
٤. شهادة اللقب (بتقدم عليها في القنصلية المصرية في بيبيك و تاخدها تاني يوم - دفعت ٧٥ ليرة).
٥. عقد ايجار متنوتر (بالنسبة لي نوترته في نوتر ٢٩ عند محطة ترام يوسف باشا - دفعت ٥٩ ليرة).
٦. تأمين صحي (سيجورتا) سواء سنة او سنتين زي ما تحب (راجع البوست المثبت - ٣٠٥ ليرة سنة واحدة).
٧. عدد ٤ صور شخصية.
٨. عندي حساب بنكي بس مخدتش معايا كشف بناء على كلام صديق ليا و فعلا مطلبوش مني.. تقريبا حسب تقييم الموظف او مبقوش يطلبوه من المصريين.. مقدرش افتي في الموضوع ده.
بس كده ان شاء الله.
شوية ملحوظات بسيطة ممكن تساعد حد:
- البوست المثبت فيه لينك عن الاقامة السياحية لازم تراجعه.
- متروحش متأخر ايا كان موعدك امتى.. روح من الساعه ٨ الصبح بحيث تنجز لان اليوم كان متعب جدا بالنسبة لي و طالما موعدك في نفس اليوم هيدخلوك اشطة.
- اليوم متعب - متروحش مطبق زيي- انا كنت مضطر افضل واقف ٥ ساعات على رجلي.
- لو مش عارف لغة كويس ممكن تاخد معاك حد بيتكلم تركي صاحبك و بيدخل بجواز السفر عادي كانه جاي يسأل عن اجراءات معينة فوق.. مش هيطردوه ولا حاجه ولا لازم يكون معاه موعد زي ما سمعت!
- الموظفين بيبقى عليهم ضغط كبير و مش هتلاقي حد بيتكلم انجلش الا لو كان حظك حلو زيي و عشان كده لازم تاخد بالك من اشاراته كويس ولو لقيته رخم ومفهمتش شاورله يكتبلك و بعدين روح مكتب الاستعلامات هتلاقي اللي بيتكلم عربي او انجلش اسأله.
- لو انت عايز تختصر خطوة الدفع (ودي معلومة مشوفتش حد قالها هنا) ممكن تدخل الضرايب اللي قبل مبنى البوليس وتدخل يمين.. اول مكتب ع اليمين هتلاقي kiosk machine على يمينه اختار اول اختيار ödeme و خد رقم.. ادخل المكتب و روح يمين وتابع الارقام.. لما تلاقي دورك روح اديله ورقة الضرايب اللي طلعتها قبل كده و اديله الابلكيشن بتاع موعد التقديم (لازم الابلكيشن يكون معاك) و هياخد الفلوس ويديك وصلين تحطهم مع الورق اللي قولت عليه فوق.
- راجع لينك الاقامة السياحية في البوست المثبت.
- لو الموظف راجع ورقك وكل حاجه تمام هيطلع يقولك روح ادفع (ده لو مكنتش دافع و معاك الوصل) و بعدين ترجعله تاني تستكمل اجراءاتك.
- لو اي حاجه تانيه مطلوبة منك تستكملها هيكتبهالك ع الابلكيشن و يديك ورقك كله تاني .. روح استكمل وبعدين روح الامنيات تاني سواء لحقت في نفس اليوم (قبل الساعه ٥) او اليوم اللي بعده.. المهم لو روحت يوم تاني متروحش من بدري.. انا كنت بستكمل نوترة عقد الايجار و رحت تاني يوم الساعه ٤.. اللي قاعدين من الساعه ٨ و ٩ الصبح مشوا معايا الساعة ٥! يمكن دي حالة فردية بالنسبة للموظف اللي كان حظي معاه بس انا بحكي تجربتي.. مش شرط يحصل معاك كده.
- اول ما تسمع كلمة "سيستم يوك" قول يارب :-D
- خود معاك كوينز عشان هتحتاج تشرب اي مشروبات ساخنة او باردة لانك هتقضي اليوم كله هناك تقريبا و فيه ماشينز في كل دور هناك و اسعارها حلوة جدا.
