جورجيا

جورجيا

1- جواز سفر ساري

2- عدد 2 صورة شخصيه حديثه

3- كشف حساب بنكي

4- سجل تجاري وبطاقه ضريبيه لاصحاب الاعمال

    او خطاب من جهه العمل للموظفين

    او شهاده قيد من الجامعه للطلبه

5- وثيقه تأمين

6- حجز فندق وحجز طيران

مده الحصول عالتأشيرة من 15 يوم – 20 يوم ،، يتم اجراء مقابله شخصيه

العنوان: 11 طنطا، الحويتية، العجوزة، الجيزه

الهاتف: 02 33044768

#السفر_الى_جورجيا
........................
#شروط_سفر
........................
تقرير السفر الى جورجيا للسياحه باقل تكلفه ممكنه
.......................
جورجيا موقعها الجغرافي بين شرق اوروبا و غرب اسيا علي امتداد سلسلة جبال القوقاز جورجيا بتشترك في الحدود من الشمال مع روسيا و من الجنوب مع ارمينيا و تركيا و اذربيجان و من الغرب بتطل علي البحر الاسود و هي عضو في المجلس الاوروبي و الامم المتحده و حاليا بيستعدوا للانضمام للاتحاد الاوروبي. واحده من اجمل الدول المعروفه بالكنائس القديمه و الطبيعه الجميله!

-عدد السكان 3.3 مليون نسمه تقريبا
-عاصمة جورجيا هي مدينة تبليسي
اللغه الرسميه هي اللغه الجورجيه
-الجورجيين شعب متدين جدا و معظم سكان جورجيا من المسيحين الارثوذكس.
- العمله الرسميه هي اللاري ... 1 لاري = 0.47 دولار = 4.14 ج

*بالنسبه للجزء المهم و هو السفر!
التأشيرة : بالنسبه للمصريين جورجيا تحتاج تأشيرة دخول مسبقه و سعر التأشيره 20 دولار بتتدفع بالفيزا او الماستر كارد! بتقدر تقدم علي التأشيره بطريقتين مختلفين عن طريق انك تروح سفارة جورجيا في القاهرة لو حابب انك تاخد تأشيره ملصقه فى جواز سفرك او اونلاين عن طريق الموقع د و بتجيلك على الايميل تطبعها و تسافر بيها :https://www.evisa.gov.ge/GeoVisa/
التأشيره سهله مش صعبه!

*المطلوب للتأشيره صوره الوان سكانر من جواز السفر و صوره شخصيه و تملي بياناتك عن طريق الموقع اللي فوق! و بتدفع ال 20 دولار و التأشيره بتجيلك علي الايميل في مده من 10 ايام و ساعات بتتأخر و بتوصل ل 20 يوم التأشيرة دخول متعدد بتسمحلك تقعد 30 يوم فى جورجيا فى خلال 180 يوم ...
*ملحوظه مهمه لو انت مصري معاك اقامه او تأشيرة سياحه ساريه لبعض دول الخليج زي السعوديه و الامارات او الاتحاد الاوروبي و امريكا فانت تقدر تسافر جورجيا علطول من غير تأشيرة و تقدر تتأكد من الدول دي من الموقع اللي فوق ...

الاوراق المطلوبة عن الوصول في مطار جورجيا
1- تأمين طبي : تعمله من شركة Allianz او Travel Choice مثلا لدول الاتحاد الاوروبي و البحر المتوسط تكلفته 71 ج تقريبا للاسبوع!

2- حجز فندق :تقدر تحجز من علي موقع www.hostelworld.com تعمل اكاونت علي الموقع و تختار المدينة اللي هتقعد فيها في جورجيا و تختار هوستيل تكلفته من 4 دولار لحد 15 دولار في الليله بس و انت بتختار هوستل حاول يكون في وسط العاصمه زي شارع روستافيلي مثلاً او freedom square و يكون ال reviews عليه كويسه! بدل اما تروح و تتمرمط! ولو وصلت و الهوستل معجبكش قضى فيه ليله واحده اللى انت دفعت فلوسها و دور على هوستل تانى .. بتحدد المدة اللي هتقعدها اسبوع مثلا لو هتكلف 70 دولار انت بتدفع 12% فقط من اجمالي المبلغ و بيجيلك رساله علي الايميل بتاعك بالحجز المبدأي و اما بتسافر و بتوصل الهوستل بتدفع باقي المبلغ!

- الاثبات انك معاك الفلوس اللى تغطى اقامتك و مصاريفك اثناء وجودك فى جورجيا! يفضل و انت مسافر يكون معاك 500 دولار ع الاقل بحيث تكون فى الامان!

-تذكرة طيران ذهاب و عوده و ارخص تيكت طيران هو علي شركة Air Cairo بيعملوا رحله واحده في الاسبوع كل يوم احد تكلفتها 2500 ج
تطبع التأشيرة 3 نسخ الوان .. نسخه للذهاب و نسخه للعوده و نسخه احتياطي معاك و متحجزش الطيران و الهوستل الا بعد اما تستلم التأشيرة عشان لو التأشيره اتأخرت الحجوزات متضيعش عليك!

تطبع تكت الطيران و حجز الهوستل نسخه للمطار و نسخه احتياطي! و غالبا بنسبة 90% مش هيسألوك في المطار ولا هيشوفوا اي ورق معاك غير جواز سفر و التأشيره بس خليك في الامان و اعمل الورق دا و خليه معاك عشان لو حد سألك!

اول اما توصل روح اشتري شريحه ب 5 لاري و حط فيها رصيد ب 5 لاري و باقة نت 4 جيجا ب 10 لاري هيكفوك و هيفيض و اقوي شبكه هناك اسمها magticom و مقر الشركة في نص شارع روستافيلي ناحية الشمال! مع العلم الهوستل بيبقي فيه wifi اسرع من اللي عندك في مصر و الشوارع الرئيسيه فيها wifi مفتوح للناس!

بالنسبه للمواصلات ممكن تعمل اشتراك مترو معرفش بكام بصراحه بس مبلغ رمزي.
اقل اجره للتاكسى 1 لارى و اغلى اجره من 8 ل 10 لارى! و الاجره الشائعه لاكتر المشاوير فى العاصمه من 3 ل 5 لارى!

بالنسبة للاكل لو هتجيب اكلك و شربك و حاجتك كلها كميات كتير كمان من السوبر ماركت و تعمله بنفسك في الهوستل فدا هيكلفك حوالي 50 لاري للاسبوع الواحد يعني 200 ج تقريبا
لو هتاكل و تشرب بره فدا هيكلفك حوالي من 15 ل 20 لاري في اليوم
-الاماكن السياحية اللى بنصح بزيارتها!
Kazbegi, Kakheti, Uplistsikhe, Davit Gareja, Batumi, Mtskheta, Svaneti Mestia
كذا ملحوظة مهمه :-
- فى حالة انك حابب تروح Svaneti فانت هتحتاج تقعد اكتر من اسبوع لانها هتحتاج 3 ايام لوحدها على الاقل و لازم تحجز طيران داخلى فى جورجيا قبلها بشهر على شركة
و Vanilla Sky لان الاماكن كلها بتتحجز بسرعه

- التاكسى من المطار للعاصمه خد التاكسى من بره هيكلف من 20 ل 30 لارى.

- امثلة للاكل الجورجى : Khinkali , Khachapuri , Chanakhi , Churchkhela
الاسعار للوجبة من 2 ل 8 لارى حسب المطعم و الحجم

- مشكلة التواصل و اللغه ممكن تحلها عن طريق انك تستخدم جوجل للترجمه او تتواصل مع الشباب الصغير بيتكلموا انجليزي و نسبة كبيرة جدا من المحلات بتتكلم انجلش عادى! فالتواصل مفيش فيه مشكله هتعرف تتعامل!

-الشرطة هناك محترمه و عندهم تقبل لاى شئ مهما كان و بشوشين مفيش حد هيرخم عليك او يوقفك امشى و انت واثق فى نفسك مش مقلق تماما!
-البلد امان جدا نسبة الجريمة فيها تكاد تكون معدومه! امشى اى وقت لوحدك و انت مطمن تماما!

-اوعى تعاكس البنات مهما كانوا لابسين حتى لو ماشيه فى الشارع من غير هدوم لانها هتهزقك لانهم عندهم الطبع الشرقى و العادات والتقاليد فى الحاجات دى! لو مسافر عشان تعمل حاجه او تفتكر انك هتقضيها بنات فمنصحكش لانهم متشددين و ملتزمين! و البلد صغيره و بيخافوا من ان حد يوصل الكلام لاهلهم!
لكن تقدر تتصاحب على الناس هناك عادى جدا باحترام مهما كان جنسهم سواء من جورجيا او غيرها هتلاقى ناس كتير مسافره من كل الدول زيهم زيك اتعرفوا على بعض و اخرجوا فى جروبات!

- التزم بالمرور والا عربية هتيجى تطيرك و الالتزام بقواعد المرور هناك و الاشارات اجبارى! و حافظ على نضافه الشارع و مترميش زباله او سيجاره على الارض الناس هتبصلك باحتقار و اشمئزاز!

- متستغربش ال BMW , Mercedes , VW هناك تاكسى عادى جدا!

-المصاربف : 2500 ج طيران
- من 700 ج ل 1000 ج هوستيل
- الاكل و الشرب و الخروجات دى ترجعلك و تختلف من شخص لتانى حسب مصاريفه الشخصيه!