عشان تحجز ارخص تذكره طيران

*١٠- نصائح لتسهيل السفر للجميع*
10 نصائح للمبتدئين عشان تحجز ارخص تذكره طيران
----------------------------------------------------
1- الدخول من متصفح متخفي
في اي متصفح بيبقي موجود حاجه اسمها new private window اللي هي Ctrl+Shift+N .. ادخل ابحث من عليه مش من ع المتصفح الاساسي
ليه بتعمل كدة ؟ عشان سكاي سكانر وال cookies اللي عليه لما بتعمل سيرش طويل الموقع بيعرف انك بتدخل كتير جدا وبيسجل ال URL بتاعك ف بيزود عليك الارقام مع كل مرة بتدخل تعمل سيرش
لكن لما بتدخل من متصفح متخفي مبيقدرش يسجل دخولك في كل مرة وبالتالي الارقام بتوصل ل فرق 600 جنيه تقريبا بين السعر علي المتصفح الاصلي والوهمي ( تقدر تجرب وتشوف بنفسك )
.

2- حاجه اسمها cheapest month
ودي بتجيبلك ارخص الاسعار للدوله اللي انت رايحها في ارخص شهر ليها لزيارتها .. بس الخدعه هنا انه نفترض جابلك شهر 8 مثلا هو ارخص شهر لزياره دوله معينه
.
متاخدش ايام الذهاب والعودة اللي طلعتلك في ارخص شهر دة كأنها ارقام ثابته وتفرح بالرقم اللي جابهولك وتقول امين وخلاص
.
لا .. انت هتقوم مثبت يوم الذهاب في ال cheapest month وتبدا تلعب في ايام العودة في الايام اللي حوليها وهيطلعلك اسعار اقل كمان من الارقام اللي سكاي سكانر ادهولك
يعني مثال اوضح :
لو ال cheapest month لزيارة تركيا مثلا طلعلك شهر 8 .. وطلعلك ارخص سعر في شهر 8 دة هيكون ذهاب يوم 20 مثلا وعودة يوم 28
متقومش تفرح بالارقام دي وخلاص
لا هتقوم مثبت يوم 20 اللي هو الذهاب في البحث وتبدا تغير في ايام العودة .. مرة تجرب يوم 29 .. مرة تجرب يوم 30 .. مرة تجرب يوم 27 وهكذا وهكذا .. هتثبت يوم الذهاب وتلعب في يوم العودة
هتلاقي ارخص وارخص من الرقم اللي طلعلك كمان
.
3- حاجه اسمها multi city ticket
ودة الحل السحري ل تذاكر الطيران الغاليه ل دول شرق اسيا تحديدا
.
الفكره في التذكره دي انها بتخليك تروح من مصر ل بلد معينه وبعدين ترجع من بلد تانيه خالص ل مصر
.
يعني بتخليك تزور اكثر من بلد في نفس الرحله بثمن تذكره طيران بلد واحدة وبتبقي ارخص بكتير جدا من انك تروح بلد لوحدها ذهاب وعودة من نفس البلد
.
يعني لو طبقنا مثال علي دول شرق اسيا
هتلاقي تذاكر طيران ماليزيا أو اندونيسيا كل واحدة فيهم لوحدها معديه 8000 جنيه .. يعني لو عايز تروح كل بلد فيهم لوحدها هتدفع 16 الف جنيه عشان تروح الاتنين
.
لكن لو حجزت multi city ticket الاتنين مع بعض ذهاب من القاهرة ل ماليزيا مثلا وعودة من اندونيسيا للقاهرة هتلاقي التذكره المجمعه دي ثمنها 8000 جنيه او ازيد حاجه بسيطه
يعني هتبقي زورت بلدين بثمن تذكره بلد واحدة فيهم
.
وفي حركه صايعه بتتعمل ف البحث في اوبشن ال multi city ticket وهي انك تغير امكان الذهاب والعودة وبالتالي ممكن يطلعلك التذكره ارخص
.
يعني ممكن تعكس وتخلي التذكره ذهاب من القاهرة ل اندونيسيا و عودة من ماليزيا ل القاهرة .. ف تلاقي التذكره بقت ارخص وهكذا وهكذا ..
.
( طبعا انت بتحتاج ل مواصله داخليه بين البلدين سواء طياره او اتوبيس )
افضل خطوط طيران داخلي لدول شرق اسيا هما air asia - tiger air - jet star
افضل خطوط طيران داخلي لدول اوروبا هما easy jet - ryan air
.
ولاحظ ان كل شركات الطيران الداخلي دي شركات low cost يعني من غير شنطه بتتشحن أو وزن عشان متلبسش ف الحيط وتفتكر انهم شركات طيران عاديه
.
والاحسن لو هتطلب وزن علي التذكره انك تطلبه وانت بتحجز مش لما توصل المطار عشان لما بتوصل المطار بيعتبروها غرامه وبتدفع اكثر بكتير من لو انك طلبت وزن وانت بتحجز التذكره من الاول
.
4- اعمل السيرش لكل المطارات مش مطار واحد بس عشان لو في عرض علي مطار معين يجيلك
يعني بدل مثلا ما تعمل سيرش من مطار القاهرة بس لا تعمل سيرش من egypt كلها عشان لو في رحله من مطار داخلي ارخص من مطار القاهرة يجبهالك
.
وقارن الاسعار علي مواقع طيران مختلفه لنفس الرحله اللي انت عايزها سواء من موقع شركه الطيران نفسها او من المواقع الوسيطه زي ويجو و اكسبيديا الخ الخ

.
5- انك تستخدم مدينه ك base ل رحلاتك وسط بلاد مختلفه
يعني ايه الكلام دة ؟؟
مثلا مثلا مدينه ميلان في ايطاليا من ارخص المدن اللي ممكن تسافر منها علي بلاد كتير اوي في العالم ( اعمل سيرش واتأكد بنفسك )
تقوم انت حاطط ميلان مركز عشان تسافر منها ل روما ,, وتسافر بعدها منها ل مدريد ,, وتسافر بعدها منها ل باريس الخ الخ
وممكن تجرب الموضوع دة في دول شرق اسيا
.

6- ابعد عن ايام الجمعه والاحد في اي حجوزات ودائما ركز في بدايه بحثك علي يوم الثلاثاء
لان الجمعه والاحد هما ال high time للحجوزات عشان الناس اللي رايحه ويك اند والناس اللي راجعه من الويك اند ( الويك اند في كل العالم بيبقي سبت وحد )
واثبتت الدراسات ان ارخص ايام الحجوزات بتبقي يوم الثلاثاء وسط الاسبوع
.

7- حاجه اسمها Price Alerts
مواقع زي kayak او skyscanner بيكون عندها حاجه اسمها price Alerts ودي انك بتديهم ايميلك وهما لما يلاقوا تذكره طيران رخيصه أو تذكره طيران عليها عرض للوجهات اللي انت بتبحث عنها دائما يقوم يبعتولك ايميل بالتذكره الرخيصه دي
طبعا شرط انك تستفيد من الحوار دة انك تكون flexible ومرن في مواعيد سفرك م مرتبط بمواعيد معينه
.

8- لو مسافر مدينه بعيدة عن العاصمه ف البلد اللي انت رايحها احجز تذكرتين منفصلتين مش لازم تذكره كامله واحدة
بمعني .. لو مثلا رايح بالي في اندونيسيا .. ولقيت تذكره طيران من القاهرة ل بالي ب 10 الاف جنيه .. ساعتها احجز من القاهرة ل جاكرتا ومن بعدها من جاكارتا ل بالي
وقتها هتلاقي السعر اقل بكتير من انك تحجز من القاهرة ل بالي مباشره
.

9- يبقي في مرونه في مواعيد سفرك يعني متبقاش مضطر تسافر في يوم معين ومحدد ولو اتأخرت يوم واحد عنه تقول مش هسافر .. مهو انت كدة هتشتري بالغالي وبأي سعر قدامك .. لكن لو فيه مرونه في مواعيد سفرك ساعتها هتعرف تجيب ارخص سعر للطيران

.
10- التذكره الرخيصه عايزة صبر وطوله بال في البحث .. لو معندكش صبر يبقي احجز بالغالي وخلاص .. لكن التذكره الرخيصه عايزة تعب ف البحث وعايزة صبر عشان تقدر تقلب وتعمل سيرش علي كل الارقام والايام المتاحه ..

دلوقتى ناس عايزه تسافر برا مصر بارخص و اققل تكلفه و جهد

بعد لف كتير و بحث و سفر التجربه الافضل ليك كمصرى انك تسافر برا مصر

( سواء سياحه - شهر عسل - هجره عمل ... الخ )

هى الامارات و تحديدا دبى او الشارقه

فيزا الامارات تعتبر مكلفه شويه بمتوسط 1800 جنيه للشهر الواحد

( فيزا تايلاند 800 - سنغافوره 600 - الصين 1000 و كذلك بعض دول اوروبا لو هتعملها بنفسك هتبقى فالرينج اققل من 2000 جنيه )

عندك فيزا اغلى من الامارات ك سلطنه عمان 2400 للشهر الواحد و امريكا 3000++ و الكويت حدث ولا حرج بتسمع رقم وحش

التلت شهور فى الامارات بتكلف 5000 جنيه او اقل شويه للفرد الواحد

بتبقى المشكله الاولى لما اعوز اعرف انا الفيزا عايزه منى ايه عشان اسافر

دور على البلد الى انت عايزها هنا و افتجها هتلاقى متطلبات الفيزا و بيانات السفارات

www.mytravelsupport.blogspot.com

عرفت انت هتعمل ايه عشان تسافر نيجى للسفر نفسه

طبعا حجز الطياره ممكن تحجزه من شركه .. شركاتا لسياحه بتاخد عموله متوسطها 200 جنيه زياده على حجز التذكره مقابل انهم يحجزوهالك ... لو انت مش خبير فالحجز اعمل كده عشان متبقاش دافع 6000 جنيه ولا حاجه و تبوظ الدنيا عشان توفر 200

سعر التذاكر بعد التعويم من 3000 لمالانهايه .... تعتبر الامارات من الوجهات الرخيصه بمتوسط 4000 الى 5000 سعر تذكره الذهاب و العوده بينما اوروبا دايما بتبقى اعلى من كده و اسيا المتوسط بتاعها 7000 الاف جنيه و امريكا دايما بتكسر رقم العشره الاف جنيه تمن التذكره ... ( يتثنى فترات العروض طبعا )

عايز تدور لوحدك و توفر عموله شركات السياحه

www.skyscanner.com www.cheapfligths.com

و بكده لحد دلوقتى الامارات للفرد فى شهر 2000 فيزا + 4500 تذكره ذهاب و عوده

متوسط *

نيجى للسكن و دا بيختلف بين كل فرد لفرد ففى حين الامارات تقدر تبداء بسرير فى سكن شباب او سكن بنات .. ب 500 درهم فى الشهر ( 2500 جنيه ) الى 30 و 40 الف جنيه شهرى لو بتأجر غرف او استودويهات خاصه بالشهر ... فى اوروبا ( عدا تركيا ) السكن مكلف بينما فى اسيا ممكن شهر فى سكن شباب فى ماليزيا اوا ندوسيا يبقى بمتوسط 2500 جنيه برضو ... و مازالت امريكا و كندا هى الاغلى من حيث السكن برضو

فى موقع www.skyscanner.com هتلاقى قسم للسكن سواء شباب او فنادق و فى عندك booking.com موقع ممتاز للبحث عن سكن باسعار مختلفه حسب كل واجد و ميزانيته

كده الامارات لو هتقعد شهر 4500 طيران + 1800 فيزا + 2500 سكن شباب

فى المقابل ماليزيا مثلا 7000 طيران + بدون مصاريف تذكر للفيزا لكن هناك تصريح امنى من المجمع + 3000 سكن شباب برضو

فهى بتبقى نسبه و تناسب على حسب الوجهه و السفر عموما دا انا بتكلم فى اققل ميزانيه للسفر ممكن انت كواحد تصرفها عشان تسافر

بالنسبه للمصروفات الشخصيه و دى بتختلف من مكان لمكان و يفضل دايما تقيسها بالدولار بحيث انك ممكن تاكل ب 10 دولار فالامارات او تركيا وجبات كويسه فى ماليزيا او اندونسيا الغدا اليومي ممكن يكلفك 5 دولار ... فى اوروبا و امريكا هتبقى اعلى منهم طبعا

بينقص عليهم المواصلات و تكلفه المزارات فالدول دى سواء سياحه او تاريخيه

و دى بتختلف من فرد لفرد برضو و هنا لازم تكون محدد هدفك انت رايح تعمل ايه

فتره السياحه الى ممكن تكلف واحد 500 دولار مزارات و فسح ممكن تبقى بالنسبه لواحد تانى تكلفتها 200 دولار فى نفس المده و هنا بتحتاج مواقع تعرفك تكلفه المعيشه كمتوسط فى الدول زى

https://www.numbeo.com/cost-of-living/

و بناء عليه فعشان تقرر السفر لوجهه معينه عندك

1 تكلفه الفيزا

2 تكلفه الطيران

3 تكلفه الاقامه و السكن

4 تكلفه الطعام

5 تكلفه المواصلات و الزيارات

و كبدايه صعب تكون فى سغريه للخارج بتكاليف اققل من 15000 جنيه عشان متروحش تدبس انه الميزانيه خلصت

خطوات السفر لدبى

لناس الى ناويه تيجى الامارات ... شويه نصايح عشان ميضحكش عليكم

الدرهم اليوم (4.7 ) جنيه

الفيزا شهر سياحه كبيرها 1850 جنيه للمؤهل

بدون مؤهل عالى هتبقى بين 2400 ل 3000 جنيه للشهر

و ساعتها بلاش تيجى احسن

الفيزا تلت شهور سعرها من 4800 ل 5300 جنيه اكتر من كده

يبقى بتتقلب فى فلوس

( للمؤهلات العليا )

الطيران : ارخص طيران العربيه للطيران و ارخص مطار الشارقه

من اول 4700 و لحد 5500 ( رايح جاى ) اكتر من كدا يبقى الطيران غالى

السكن ( فى تلت مدن رئيسيه للسكن ( عجمان) و دى ارخص واحده بس بعيده و بعدها ( الشارقه و دى برضو مواصلتها مكلفه) و فى دبى و دى تعتبر اغلاهم بس هتوفر شويه فى وقت و وفلوس الانتقالات

اسعار السكن بتبقى سرير من اول 550 درهم و مفتوح فى ناس كانت بتدفع 2000 درهم فى غرفه مشتركه المهم تاخد حاجه جنب محطه مترو او باص و المتوسط بتاع الايجار فى البلد عموما للسرير من 750 درهم ل 1000 درهم .. شامل ميه و كهربا و نت

البلد كلها بتتكلم انجليزى فانت لو مش بتعرف تتكلم انجليزى متجيش الامارات

السواقين و عمال النظافه و بتوع التذاكر و المحلات و التاكسى كلهم بيتكلمو انجليى و نادر لما تلاقى حد بيتكلم عربى

( اوعى تركب تاكسى غالى جدا )

فى اقامات سنتين اسعارها فى حدود 12 الف درهم و هى مبلغ كتير و مش مجديه قوى احسنلك شوف وظيفه تعمل اقامتك عليها

المواصلات عجمان معرفلهاش نظام مواصلات الصراحه ... الشارقه فى بطاقه ساير بتركبك اوتوبيسات بتلف بعض المناطق ب 4 و نص درهم الاتجاه الواحد

دبى فى كارت بتشتريه و تشحنه رصيد و تركب بيه كل المواصلات

اوتوبيس او مركب او مترو و التذكره من 3و نص درهم ل 7 درهم على حسب اتجاهك ..

الاوتوبيسات مبتقفش غير فى المحطات و مينفعش تكلم السواق ولا تاكل جواها

مينفعش تعدى الشوارع برا الاشارات

( الغرامات بتبداء من 200 درهم ل 2000 درهم )

الشغل

اماكن تشوف الشغل فيها قبل ما تروح

https://mytravelsupport.blogspot.com.eg/p/blog-page_64.html

لما تشتغل عشان تاخد اقامه هيتعملك كشف طبى بيرفضو فيه ناس كتير فاحسنلك اققرا عنه قبل ما تصرف فلوس كتير

https://mytravelsupport.blogspot.com.eg/p/blog-page_52.html

دى معلومات عن عقد العمل عشان محدش ينصب عليك هناك الدوله بتحميك

https://mytravelsupport.blogspot.com.eg/p/blog-page_54.html

بيانات حول اقامه العمل فى الامارات مهمه

https://mytravelsupport.blogspot.com.eg/p/blog-page_8.html

لازم تبقى عارف من هنا الشركات الى هتروح تقدم فيها عشان هناك مينفعش تقول هنزل الف و ادور الدنيا غاليه و اللف مكلف جدا

اشهر شركات

( النابوده - الفطيم - الحكير - دو - اتصالات الامارات - و منطقه محطه مترو مدينه الانترنت هتلاقى فيها شركات عالميه كتير - هتلاقى اماكن توظيف فى منطقه اسمها سوق نايف و ديره دبى كتير برضو )

حمل ابليكيشن RTA من على جوجل ستور او ابل ستور ... دا هيئه المواصلات هناك بيعرفك سير خطوط المواصلات و مواعيدها من غيره مش هتعرف تتحرك

المواصلات بتقفل من 12 و بعدها ملكش غير التاكسى الى بياكل الفلوس اكل

الانترفيوهات هناك هتبقى مع ناس مبتعرفش عربى اصلا و هيبقى قاعد جنبك

هنود و باكستانيين و اسيويين و روس و كل الجنسيات العربيه

فحتت انك بتقول كلمتين انجليزى و بتعرف تفتح الايميل من الكمبيوتر دى متنفعش هناك

لازم تبقى رايح مؤهل فعلا و مميز فى حاجه

الراتب البدائى ( 3000 درهم ل 3500) اققل من كده هتعيش بصعوبه

متوسط راتب المصريين هناك من 3500 ل 10000 درهم

( مش بتكلم على فئه المهندسين و الدكاتره و المدراء طبعا دول بياخدوا كتير )

- الى هتعمله فى شهر هناك... الى فى مصر بيعملوه فى سنه -

لعمل في مهنة التمريض الطب الصيدلة لازم ترخيص مزاولة مهنه
والترخيص بيكون حسب الاماراه اللي موجود بها 
يعني ابوظبي ترخيص Haad ( هيئة الصحه بابوظبي )
دبي DhA ) هيىة صحة دبي )
باقي الامارات الشارقه عجمان رأس الخيمه أم القيوين Moh
ترخيص الوزاره 
او تشتغل بدون ترخيص بيطلع لك اقامه انك موظف استقبال كاشير في مركز طبي ولكن في الأصل بتشتغل تمريض بس لو حد جة من الوزارة أو هيئة الصحة بيخالفك

بالتوفيق

هنا الهجره العشوائيه

علشان تقدم فى الهجرة العشوائية في امريكا 2019
لازم تعرف ان التقديم هيفتح يوم الثلاثاء 3/10/2017 وهينتهى 7/11/2017
التقديم بيكون الساعة السادسة بتوقيت القاهره بالنسبه ليوم التقديم وليوم الانتهاء.
انت هتحتاج ايه بقي علشان تقدم.

1- لو عندك حب استطلاع وعايز تعرف التعليمات بتاعة الهجره اضغط على الرابط ده.
https://goo.gl/H2kBFP

2- مطلوب صورة شخصيه حديثه بمقاس 5 × 5 يعني (600 × 600) بيكسل
ده لو انت سنجل ، لو انت متزوج هتحتاج لكل افراد الاسر من اصغر طفل لاكبر شخص نفس الصوره بنفس الموصفات دي.
وده شرح كامل لتعديل الصوره بنفسك اتبع الخطوات وانت هتعرف تعدلها
انت ممكن تتصور بالموبيل او تتصور فى استوديوا وتاخد الصوره منه وتعدلها بنفسك
https://goo.gl/9Gk7CT

3- بريد الكتروني علي اى شركه سواء الياهو او الهوت ميل او جوجل
لو مش عندك اميل او مبتعرفش تعمل اميل شوف الشرح ده
https://goo.gl/cvrUVu

4- يكون معاك رقم تليفون طبعااا وده اكيد الطلب الوحيد اللى معاك 😂

5- طبعا هتحتاج تكتب العنوان بتاعك بالتفصيل زى ما هو موجود فى جواز السفر او البطاقه ولو العنوان الحالى غير اللى موجود فى البطاقه او جواز السفر اكتبه بردوا مفيش اى مشكله والعقبه اللى بتقابل الناس انهم مش عارفين يجيبوا الرمز البريدى او مايسمى الـ zip code شوف الشرح ده وانت هتعرف.
https://goo.gl/9MNq1r

6- غير مطلوب جواز سفر او اثبات وظيفه او شهادات خبره في التقديم خالص.

7- طبعا التقديم باللغه الانجليزية انت مش بتكتب ولا حرف باللغه العربية اصلا.

8- لازم تكون مكمل 12 سنه فى التعليم علشان تقدر تقدم في الهجره
ولو مش مكمل 12 سنه من التعليم تقدر تقدم بأى شهاده معاك حتى لو الابتدائية ولكن هتحتاج شهاده خبره تقدمها في السفاره يوم المقابله ودى فى حاله الفوز.
وشوف الشرح بردوا قبل التقديم.
https://goo.gl/yLKwx2

9- كل الدول العربية مؤهله فى الهجره يعني انت مش هتجاوب علي السؤال السادس خالص ، هتلاقى متعلم عليه Yes هتسيبوا زى ماهو ومش تختار اى حاجه ، بخلاف فلسطين طبعاا ليهم اجابه محدده وهتلاقى الاجابه فى الرابط اللى فى رقم 11.

10- اخر نصيحة اياك والكذب خليك صريح فى الاجابه على كل سؤال علشان لو فوزت بيتم تعبئة استماره الفوز ووقت المقابله فى السفاره بيتم مطابقه البيانات دى كلها ولو فيه حاجه غلط او كدب او جايب ورقه او شهاده او اى حاجه هتقدمها للسفاره مش مكتوبه فى اى استماره سواء تقديم او فوز هيتم الرفض ياباشاااا.

11- ده شرح كامل لكيفيه التقديم فى الهجره 2019 شوفوا الشرح وانا تحت امركم فى اى سؤال.
https://goo.gl/cmDTXe

* خلصنا اهم النقط ده الموقع اللى بتدخل تسجل عليه ان شاء الله
www.dvlottery.state.gov

كل شىء عن الهجره المجانيه لامريكا

السلام عليكم ورحمه الله وبركاته
بعد السلام واحلى الكلام النهارده هتكلم معاكم عن كيفية التقديم فى الهجره العشوائية لامريكا ، يعنى الموضوع كامل متاكل من الالف للياء وممكن يكون طويل شويه ولازم تكون صبور وانت بتقرأ والله الموفقه ، يلا بينا 😊😋
..
الاول / مقدمه عن الهجره لامريكا
الهجره لامريكا مقدمه من الخارجيه الامريكية وبتتعمل سنوياً وبيختاروا 50 الف فيزا على مستوى العالم وكل دوله ليها حصه من المكسب بمعنى يعنى بيختاروا من مصر 4800 او 4500 او 4300 وهكذا يعنى كل سنه بيكون فيه حصه محدده لكل دوله في الفوز ولكن فى نفس الاعداد اللى كتبتها دى بتكون لمصر فقط وهكذا للجزائر والمغرب والمانيا والسودان ده على سبيل المثال لكل دول العالم بيكون ليهم اعداد مختلفه فى الفوز. الهجره بتفتح كل سنه فى شهر اكتوبر بالتحديد التقديم لمده 30 يوم تقدم اى يوم.
..
ثانياً / اهم الاسئله والاجابه عنها
..
1- طبعا علشان نكون متفقين ان التقديم بيكون لمده شهر كامل وهو شهر اكتوبر وغير مطلوب اى مستندات او شهادات او طلبات ولكن المطلوب صوره حديثه .. التقديم اون لين على الموقع ده
www.dvlottery.state.gov
..
2- ملف تعليمات الهجره العشوائيه 2019 باللغه الانجليزية انتظروا الرابط قريبا
..
3- طبعا ده الشرح الكامل للتقديم فى الهجره وده شكل الابلكيشن واليكم اللينك

الجزء الاول
https://goo.gl/N3kBhs
الجزء الثاني
https://goo.gl/hpppQx
..
4- ما هى شروط الهجره العشوائيه الشروط ان تكون حاصل على ثانويه عامه او دبلوم والسن بداية من 18 عام والتقديم مجانا اون لين بدون اى مصاريف وملئ الاستماره باللغه الانجليزية.
..
5- وانت بتملئ الاستماره متحولش تكدب فى اى بيانات علشان لو فوزت وانت كدبت وحولت تصلح الكدبه دى فى استماره الفوز هتتصلح لكن لما تدخل السفاره وقت المقابله هتاخد رفض ، على سبيل المثال كان فيه ناس مولوده فى الجزائر وعايشين فى السعوديه ولما قدموا نسوا وكتبوا انهم مولودين فى السعوديه .. ولما حالفهم الحظ وفازوا صححوا الخطا ده فى استماره الفوز وللاسف وقت المقابله اترفضوا والقنصل فكر انهم كدابين.
..
6- كتير ناس بتسألنى احنا فى سنه 2017 وانت بتقول هجره 2019 ازاى ؟
التقديم بيكون لسنه 2019 بس بيكون قبلها بسنه ونص علشان هيه اجراءات ووقت وارقام وفيلم طويل هما مقسمينها كده، #ركز هنا انت بتقدم بشهر اكتوبر فى سنه 2017 وبتنتظر النتيجه فى مايو 2018 وبداية المقابلات للفائزين فى اكتوبر 2018 ونهايه المقابلات 30 سبتمبر 2019
..
7- وقت التقديم مش لازم يكون معاك باسبور .. بس فيه نقطه مهمه جدااا لازم تكتب اسمك كما مدون فى الباسبور .. وعلشان انت مش معاك باسبور هتعمل اللى هقؤلك عليه .. هتجيب ورقه خارجيه وتكتب اسمك بالانجليش زى ما انت حافظ وبترتيب الحروف اللى بتحبها والاسم ده تكتبه فى استماره التقديم .. طيب انا ليه بقؤلك تكتبه فى روقه خارجيه علشان الورقه دى هتشلها وتحتفظ بيها لما تكسب تروح بيها الجوازات وتقولهم انا عايز نفس الاسم بنفس الحروف فى جواز سفرى .. لان ممكن الموظف يكتب ليك الاسم على مزاجه مع اختلاف الكتابه من شخص لاخر ودى ممكن تسبب ليك مشاكل قدام .. فخلينا نشتغل صح من الاول.
..
8- بالنسبه للاخوة اللى من فلسطين لما يجى يقدموا التوزيع الجغرافى بتاعهم حيكون واحد من التلات اما من غزة او الضفة او سكان إسرائيل فاللى من الضفة الغربية هيختار الاردن واللى من قطاع غزة يختار مصر واللى من فلسطينيو إسرائيل يختار إسرائيل.
..
9- موضوع #الصوره اللى محيره الناس معاك صوره قديمه ينفع تقدم بيها بس الاهم ميكنش ملامح وشك متغيره او تتصور جديده برحتك، وده شرح كامل عن الصوره انا شرحت فيه كل شئ وهتلاقى لينك مخصوص لأمثلة الصورة الصحيحة.

كيفية تعديل صورة الهجرة العشوائية لآمريكا ~ الجزء الاول
https://goo.gl/g24yVH
كيفية تعديل صورة الهجرة العشوائية لآمريكا ~ الجزء الثاني

https://goo.gl/Vb7WNm
الامثلة الصحيحة والخاطئة لصوره الهجره

https://goo.gl/AGakHj

..
10- الناس اللى معاهم اطفال لازم تضيفوا كل الاطفال حتى لو مش عايزنهم يسافروا معاكم لازم تضيفوهم .. ولو عندكم اولاد فوق ال 21 سنه مينفعش تضفوهم وهما شرحين الجزء ده فى استماره التقديم للى بيفهم انجليش هيلقي الشرح تحت السؤال ولو ضفتوهم القنصل هيرفضهم فى المقابله وده حصل مع كتير .. فريحوا دماغكم وبلاش تضيفوا حد فوق 21 سنه اختصارا للتفكير والفلوس.
..
11- بالنسبه للعائلات يعنى زوجه وزوج واطفال .. كل طلب بيتقدم بيكون بأسم فرد ومعاه باقى افراد الاسره يعنى زوجك ليه طلب بأسمه وبيضيف انه متزوج وبيضيف اسم مراته وبيناتها وصورتها والاطفال الاسم والبيانات والصور لكل طفل نفس القصه هتتعمل للزوجة لما تيجى تقدم، بس طبعا لو الزوجه مش عايزه تسافر والزوج اللي هيقدم فقط لازم الزوج يضيف اسم مراته وبيناتها وصورتها والاطفال وبيناتهم وصورهم ده مش كلامى ده نظام التقديم ومتعملش فتك وتقدم لوحدك وتقول مطلق او اعزب علشان لو مراتك مش موافقه .. علشان كده هتاخد رفض اذا كسبت .. يعنى قدم على نور وكمل على نور. والافضل ان الزوجين يقدموا علشان هتكون فرصتين بدل من فرصه واحده
..
12- فيه ناس بتكون مطلقه معاها اطفال من زوجهم القديم واتزوجوا ومعاهم اطفال من الزوج الجديد .. وعايزين يضيفوا الاطفال الى من الزوج السابق .. الاطفال دى بتنضاف فى استماره الشخص اللى مطلق فقط لكن الزوج الجديد بيضيف اطفاله اللى بأسمه فقط والام بتضيف الاتنين الاطفال القديمه والجديده والعكس للزوج .. ده فى حاله لو عايز الاطفال اللى من الزوجه القديمه يسفروا معاك
..
13- السؤال #السادس وناس كتيره بتسال عليه لو انت مولود فى مصر وعايش فى مصر او مولود فى مصر وعايش فى اى دوله .. هتسيب السؤال زى ماهو ومش هتجاوب عليه نهائى ولباقى الحالات الشاذه هتلاقى الشرح فى الصوره دى على اللينك ده http://goo.gl/SMidJ6
..
14- نقطه مهمه جداااااا لو انت بتقدم فى مكاتب كل سنه ونويت تقدم السنه دى لوحدك ياريت تروح للمكتب افضل علشان ممكن المكتب يقدم ليك لوحده وانت متعرفش يبقى انت هتقدم لوحدك والمكتب هيقدم لوحده ويبقوا كده طلبين هيترفظوا وتخسر فى الهجره
15- نقطه مهمه كمان انت قدمت ليك ولمراتك ومش ضفت الاولاد وكسبت .. مينفعش تضيف اولادك فى استماره الفوز ولو ضفتهم هتدخل المقابله وهتترفضوا كلكم
16- ممنوع التصوير بالنظاره والتقديم بيها اعتبارا من التقديم الجديد لهجره 2019
..
ثالثاً / طلبات الصوره للتقديم في الهجره ومواصفتها
..
1- أبعاد الصورة أي العرض في الطول يكون 600×600 بيكسل أي 5×5
2- حجم الصورة لا يزد عن 240 كيلوبايت وتكون الصورة بامتداد JPEG وتكون الصوره على خلفيه بيضاء.
3- الصورة تكون من بداية منتصف الصدر حتى الرأس وتكون الرأس محتلة حوالي 50% من مساحة الصورة.
4- الوجه والأكتاف يكونوا مواجهين تماماً للكاميرا حتى لا تكون الصورة ملتقطة بزاوية بحيث يكون الخدين والأذنين واضحين تماماً في الصورة.
5- لا تبتسم، تأكد من أن تبقي عينيك مفتوحتين، بدون ظل في أي من جوانب الوجه أو الخلفية - على الوجه أن يكون واضحاً ومركزاً في الصورة.
6- يمنع إضافة القبعة أو لباس رسمي ماعدا الذي يتعلق بمعتقدات دينية (كالحجاب مثلاً) فهو مسموح ماعدا ذلك لا يسمح بتغطية أي جزء من الوجه.
7- بعد التصوير والانتهاء من الصوره تقول للمصور أريد نسخة منها على سي دي أو فلاش ميموري، وتكون بمقاس 600×600 بيكسيلز
- خليني اتكلم معاكم من واقع خبرتى .. انسوا التعليمات دى والمواصفات واسمعونى فى اللى هاقوله ليكم دلوقتى.
1- يا اما تروح اى استوديوا وتقوله صوره للسفاره الامريكيه .. مش تقوله بقى للهجره والمقاس والكلام الكتير ده لان بعض الاستوديوهات متعرفش يعنى ايه هجره .. لكن هما عارفين ان صوره السفاره الامريكيه مقاسها 5×5 وانا زى ما اتفقت معاكم ان كل انواع الفيز بمقاس واحد وبموصفات واحده وان الاستوديوهات عارفه مقاس السفاره.
2- تانى حل انك تتصور بكاميرا الموبيل ويفضل بالنهار علشان الاضاءه بتكون واضحه جدااا او بكاميرا عاليه جدااا او موبيل عالى جدااا فى اى وقت.. وتخدها انت وتقصها على الكمبيوتر بمقاس 5×5 وعلشان تقصها فيه موقع تبع الخارجيه الامريكيه بتدخل عليه الصوره وتقصها بنفس المقاس وبالجحم اللى هما عايزينه وده الموقع
https://goo.gl/UBvs2B

3- طبعا الصوره ليها امثله يعنى مينفعش تتصور فى اضاء وحشه او تكون واقف معوج او لابس كاب او او او .. وده الموقع بتاعهم اللى بيوضح كل الامثله الصح والغلط.
https://goo.gl/D9comw

4- طبعا لو عايز تشيك علي صحه الصوره قبل ما تقدم عليها علشان تعرف انها سلميه او لاء ادخل الموقع ده.
https://goo.gl/Q9P88t

5- اسمعونا بقى كويس هنا الموقع اللى بيشيك على صحه الصوره بيشيك على نوع الصوره وحجمها وبس .. يعنى انت لو متصور غلط او لابس كاب او حاطط صوره قطه او كلب او اى صوره بس المقاس والجحم صح .. هيقؤلك ان الصوره صحيحه. معنى كلامى ان الموقع مش بيشيك على صوره الانسان اللى جوة يعنى الموقع ميعرفش ان الصور بتاعه انسان او حيوان. طيب المطلوب منك انك تتصور صح وتعمل المقاس المطلوب والحجم المطلوب وتتوكل على الله وتقدم.
6- موضوع احسن استوديهات بتصور صح، عندك فى الاسكندرية استوديوا اسمه غاده فى الابراهميه فى شارع اللاجتيه. وعندك على مستوى مصر فى بعض المحافظات زى القاهره استوديوا اسمه كودك ده مشهور بالصوره وفاهم. وعندك الكنائس ممكن تروح تقدم عندهم وهما بيصوروك وبيقصوا الصوره صح.
7- موضوع السيدات والبنات .. عادى جداا تتصوروا بالطرحه ولو عايزين تحطوا ميك اب عادى بس ياريت مش تغيروا ملامحكم علشان لما تتخدلوا السفاره ميكنش فيه شك. طبعا اى ست منقبه ( منتقبه ) لازم تتصور وتعين النقاب من علي وشها.
8- الاطفال الرضع.. متقلقوش من الصوره انتوا بتمسكوهم بأديكم وتصوروا وشوهم بس وحولوا تفتحوا عنيهم ولو مش عرفتوا عادى جدااا لان دول سنهم صغير ومش مطلوب منهم صوره مواصفات زى الناس الكبيره.

هتلاقى كل الشروحات هنا على الرابط ده
https://goo.gl/tdFPNR

تعرف على تكاليف رحتلك قبل السفر

ويب سايت ميقلش ابدا اهميه ولا قيمه عن "budget your trip" اللى كل الناس حبته فى البوست اللى فات: هو موقع "the base trip" حاولت انى اعمل ايديت للبوست اللى فات واضيف الكلام ده ليه لكن مش هينفع يترفع صور فعملته فى بوست منفصل خاص بيه وبصراحه هو يستاهل بوست لوحده اصلا  لان هو موقع الكل حاجه :
ده اللينك :
thebasetrip.com/en

الموقع ده عباره عن ان حضرتك هتدخل عليه وهتكتب اسم البلد اللى انت هتخرج منها واسم البلد اللى انت هتسافرلها .. 
وهيعمل ايه بقى ؟!
هيديك كل التفاصيل المفصله عن البلد دى ومش بس كده ده كمان هيقارنلك بين البلدين اللى هتخرج منهم واللى هتروحلها ! ازاااى ؟!
مثال :
هنفترض مثلا حضرتك هتسافر من "القاهره" لـ "روما" هتلاقى الاتى :
- هيقولك نبذه عن "روما" والعمله المتاحه فيها والتوقيت ومساحتها وعدد السكان والجو ودرجه الحراره
- هيقولك ان روما محتاجه فيزا والفيزا هتاخدها من السفاره الايطاليه بالقاهره وهيديلك لينك السفاره الايطاليه بالقاهره (حاجه ببلاش كده من غير ما تتعب نفسك وتدور على الموقع)
- ركز بقى فى الجاى ده عشان هو المهم, هيديلك الـ "cost of living" وده شوفناه تفصيليا فى "budget your trip" بس هنا هيزود حاجه جديده ودى ممكن هتفرق شويه مع الناس اللى خارجه للهجره او الاقامه, وانه هيقولك الـ Average salary للفرد فى الدولة دى قد ايه ؟! وبعد كده هيقولك مثلا اسعار السلع هناك كام ! الميه اللبن الجبنه الفراخ الطماطم البصل اللبس البنطلون الجينز وهيقارنلك بين مثلا اللبس فى البلد دى وبين بلدك وهيقولك انه فى البلد دى اغلى ولا ارخص بمقدار كام فى الميه ! :D

- هيديلك بقى الحاجات البسيطه الصغيره اللى ممكن تتوه علينا لكن هتعملنا مشكله لما نسافر, تخيل مثلا انت خارج من مصر اللى هى بتستخدم فيشه الكهرباء الثنائيه اللى باتنين سن وهتروح بلد تانيه فيشه الكهرباء بتبقى ثلاثيه بتلت سنون ! للاسف هتقعد فتره عشان تعرف تشترى مشترك كهرباء عشان تشحن موبايلك او لابتوبك اللى هيفصل منك! :
وكمان هيقولك بعض القوانين المهمه اللى مثلا السواقه متبقاش للى اقل من 25 سنه ! واحيانا يديلك نصايح ان السواقه خطره فى البلد دى ومينصحش انك تأجر سياره وتسوق فيها

فيه حاجات كتيره اوووووى فى الويب سايت ده صعب انها تتكتب اصلا هى بس انك تدخل تتفرج عليها وتشوف الابهار  ويا سلام بقى لو الموقع ده تشوفه ومع الموقع اللى فات هتبقى مش عايز تعرف اى حاجه تانيه من حد وده عن تجربه واللف على مواقع كتيييير ودول كانوا الخلاصه :

شكرا ورحله سعيده ان شاء الله ♥

ابديت 1 :
ده لينك البوست اللى فات اللى فيه موقع "budget your trip" الرائع بتاع التفاصيل المفصله عن التكاليف اللى ممكن حضرتك تصرفها فى البلد اللى هتتجه اليها

https://www.facebook.com/groups/travelsecretsclub/permalink/1501494393221578/

رحله سعيده مره تانيه ان شاء الله