روسيا

بسم الله الرحمن الرحيم
أولا أيه هيا نظام الحياة في روسيا من وجهة نظري 
إقتصاديا البلد بتطور الحمد لله خاصتا المؤشرات كلها بتقول إن في ظرف سنتين البلد هتتشقلب علشان كأس العالم ورواج السياحة ولو العقوبات إترفعت طبعا العملة هتزيد .
طبعا ده فرصة لكل شخص عاوز يعمل مشروع إنه ينجح ويكسب إنه يتواجد في السوق قبلها بفترة .
طيب ايه هيا المشاريع اللي محتاجة شوال فلوس : مطعم مثلا أو كافيه أو شقة وتعملها هوستل . طبعا هتحتاجلك ولا 30 الف دولار وطبعا لو معاك المبلغ ده يلا خلينا ساكتين ربنا يرزق .
طيب مشاريع ثانية تجارية الإستيراد والتصدير مشروع هايل فاكهة وخضار من مصر وإنصاص عربيات لمصر .
طيب فكرت بقى في المشروع اللي عاوزة تفتكر هتنفذه إذاي هتيجي لواحد ذيي وتقولي خليك مترجم ليا وطبعا في أي قعده هتلاقي في تصرفات تخليك تشك فيا وتبقى علطول قلقان لإنك مش فاهم بنقول ايه وكل خطوة تلاقيني بطلع عليك مصلحة وممكن أبيعك للتاجر .
طبعا أنا بدي مثال .
طيب ايه الحل والله عاوز تعيش هنا لازم تتعلم لغة قراءة وكتبة يعني تتكلمها ذي أهل البلد وتعيش في وسطهم علشان تعرف بيفكرو إذاي .
طيب التعليم بقى بلنسبة ليك إنتا كابزنس في بتاع 8 شهور ممكن تتعلم فيهم هنا لغة في أي جامعة وبتكلفك في حدود من 800 ل 1200 دولار وبيكون عندك سكن جامعي ب 50 دولار في الشهر وقول مصاريفك الشهرية لو إنتا ماسك على نفسك 100 دولار بتاخد الإقامة 10 شهور تقريبا وبعد كده بتغير الفيزا رجال أعمال .
- فيزا العمل
طيب نيجي بقى لعيوب فيزة العمل . أولا فيزة العمل ومعاكش لغة هتبقى شغال بتاع شيشة أو معمار وهترجع على بلدك طيب بلنسبة لمدى صحتها هو في ناس بتجبها فعلا بس ممكن ميعدكش من المطار لإن الفترة دي في تشديدات أمنية . طيب لو أخدتها من البلد طبعا مش هتعدي على المطار فخلاص . ثمنها تقريبا بيكون 1500 دولار وقول هتأجرلك مكان تعيش فيه ب 300 دولار في الشهر.
-فيزا الدراسة
طيب بلنسبة للي عاوز يدرس ايه هيا التكلفة وايه المجالات المتميزة بيها روسيا.
المجالات المميزة :
طبعا المواد البترولية
الهندسة بجميع تخصصاتها
الطب
السياحة
إدارة الأزمات
طيب التكلفة على حسب الجامعة والمدينة اللي بتدرس فيها
يعني مثلا خلينا نقول موسكو علشان تدرس إقتصاد ولا سياحة هتكلفك في السنة من 1600 دولار وإنتا طالع وقابله للتقسيط
الهندسة بداية من 2400 دولار وإنتا طالع
طيب الطب في موسكو من 5000 دولار وإنتا طالع
ده غير هتعمل حسابك في بتاع 500 دولار مصاريف جانبية فيزا وإعتماد شهادة وتأمين صحي وهكذا
طيب بره موسكو : عندك في مدن جامعات فيها الجامعات العادية بداية من 1500 دولار شامل السكن والمصاريف الجانبية
والطب والهندسة بدايه من 3500 دولار وإنتا طالع وفي طب باللغة الروسية والإنجليزية والفرنسية طبعا على حسب الجامعة وبتفرق في المصاريف بس الفرق بسيط يعني .
الجميل في الموضوع ده بقى ايه إن سعادتك ممكن يكون معاك دبلوم صنايع وتقدم على طب ولا هندسة عادي
ممكن تكون أدبي وتقدم هندسة ولا طب عادي .
طيب التقديم إذاي بقى حضرتك في مكاتب في مصر بتشتغل في الموضوع ده مقابل عمولة متفق عليها بياخد منك نسخة من اخر شهادة حصلت عليها لو هتقدم على بكالريوس شهادة الثانوية العامة موثقة من الخارجية ولو هتقدم على ماجستير شهادة البكالريوس موثقة من الخارجية + طبعا صورة جواز السفر يكون ساري على الاقل فيه سنتين بعد كده بيدفعك مبلغ على سبيل الحجز علشان لو لقدر الله مشيلك في الإجراءات وقررت إنك ترجع في كلامك تمام بعد كده بيبعت الورق لمندوب عنده علاقاته بتكون حلوة بناس في الجامعة اللي انتا عاوز تروح فيها المندوب ده متعود يجيب هدايا ومجاملات للموظفين بتوع مكتب القبول فطبعا بيدوله الموافقة علطول عليك . طيب هو ممكن حضرتك تقدم من على النت ايوه ممكن بس إحتمالية إن ورقك يترفض كبيرة ! طيب ليه علشان سعادتك في شباب كتير في الفترة الاخيرة بيجو على أساس أنهم دراسة ويهربو على أوربا فطبعا مش هيلاقو حد يلومو علية وطبعا الجامعة بتدفع غرامة وبتمنع تسجيل الطلاب اللي من نفس البلد اللي هرب منها الشباب لفترة فالأضمن ليك إنك تتعامل مع حد يضمنك للجامعة علشان لما تهرب يروحو يقفشو في زمارة رقبته ههه طبعا في مكاتب كتير بتعرف تخلع نفسها بإنها بتحط واحد في الوش هو اللي يلبس .
طيب وبعدين المكتب جابلك الدعوة اللي هيا بتاخد شهر وكلمك وقالك حضرلي الباسبور بتاعك وتحليل أيدز من أي معمل و صورتين شخصيتين
وبيروح يقدمهم لحد في السفارة في بلدك وبيطلعلك التأشيرة يابيقولك روح طلعها إنتا وعمتا كده كده بتاخدها متقلقش وفي مكاتب بتفضل معاك لحد متوصلك لهنا يعني يحجزلك الطيران ويخلي حد يستقبلك و ياخدك من أيدك يسكنك ويسجلك في الجامعة ويدفعك مصاريف الجامعة وهكذا
طيب نصيحتي ليكو بقى ايه في مكاتب بتدفعك مصاريف الجامعة في مصر وهو بيروح يدفعهالك طبعا هو بيكسب منك إنك بتدفعله بالدولار وهو بيكون عنده حساب في روسيا بيدفع منه وممكن ميبعتلكش حد يستقبلك وممكن يستغل إنك مش فاهم حاجة وتروح معاه وإنتا مش فاهم وتلاقي نفسك في الخر رايح تدرس باليه مائي . أعرف واحد إتنصب عليه في انه دفع للمكتب 5000 دولار على أساس إنها شاملة المصاريف وبعد لما وصل إكتشف إنه لازم يدفع مصاريف طبعا مش كل المكاتب ذي بعض في ناس بصراحة ذي الفل فالمهم تدفع مصاريفك بنفسك وتتأكد من اللي طالع عن طريقة ومتديش لحد الفلوس كاملة غير لما تشوف النتيجة بعينك ويكون بيفهمك خطوة بخطوة إنما لقيته بيلف ويدور سيبك منه .
طيب تعالو بقى نتكلم عن المنح ودي موضوعها كبيير جدا و هيلبسني مع ناس تقيله جدااا علشان المنح دي بحر واسع ومنطقة محظورة المنح بتتباع من 6000 دولار لحد 10000 دولار واللي بيبيعوها سوريين و عراقيين وأردنيين وفلسطينين في منهم صادقين وفي منهم نصابين ولاد كلب
المهم إن المنحة اللي ب6000 دي مثلا جامعتك بتدفعلها 2500 دولار في السنة يعني هتدرسلك 5 سنين 12500 دولار و سكن 3000 دولار المنحة بتوفر عليك كتير جدااا سكن ودراسة بس مشكلتها مش مضمونة
طيب أخر حاجة علشان صوابعي وجعتني
الحياة وتكاليفها
بصو ياجدعان الحياة في موسكو نااار ذي مصر بس هتستمتع بجد وفرص العمل فيها أفضل واللي هيعيش في موسكو مش هيعرف يسيبها
الحياة في المدن الثانية أرخص بكتير يعني مثلا نقول المواصلات أنا بركب تاكسي في موسكو من المطار للبيت ب 1000 روبل لو ركبت نفس المسافة في بلد ثانية 400 ولا 500 روبل وهكذا
طيب هتعرف تجيب مصاريفك حتى وانتا بتدرس
يمكن تقدر دي أرزاق اعرف ناس إشتغلت من أول شهر وناس بقالهم 6 شهور مبيشتغلوش هيا العملية أرزاق
طيب في عنصرية ؟ لأ مفيش . يابني بقولك في عنصرية ؟ أقسم بالله مفيش ياسيدي أي بلد بيكون فيها عنصرية بسيطة يعني بس مش لدرجة إنك تبقى ماشي في الشارع وتلاقي ناس بتجري وراك عاوزة تصطادك هههه يعني لو إنتي محجبة ولا إنتا متحفظ على نفسك ياعمنا البلد هنا أصلا كانت شيوعية يعني في حرية أديااان وفي هنا نسبة مسلمين ياااااماااه يعني كتير جداااا جدااا طيب إخوانا المسحيين حبايبي الكفاتسة نعم عاوزين ايه منتو ذيكم ذينا مش فارقين يعني إنتا مكتوب على قورتك مسيحي هههه كلنا واحد هنا بجد هنتعلم نحترم بعض . على فكرة أنا مسلم ودخلت يمكن ثلاث تربع كنايس روسيا يامع أصحابي وهما بيصلو يابقول الفاتحة لسيدنا عيسى ويابصور علشان أنا بصور تراث مسيحي كتير هييييح .
طيب أنا أقدر أفيدكم في ايه أقدر أفيدكم إني أوجهكم للشخص المظبوط اللي تقدرو تتعاملو معاه . ( طبعا العروض هتجيلي كتير من مكاتب علشان أجيب سيرتهم هههه ) أحب أطمنكم مبطبلش فمحدش يفكر يكلمني علشان سمعتكم سبقاكم .
المهم بقى

كان معكم مصطفى جعفر
من أدفى مكان في العالم