البرازيل

هناك العديد من التسؤلات عن اللجوء الى البرازيل , ونظراً لشح المصادر المتوفرة , تعتبر هذة التجربة لأحد الاصدقاء مصدراً غني بالعديد من المعلومات التي لا بد ان العديد يبحث عنها
هناك العديد من التسؤلات عن اللجوء الى البرازيل , ونظراً لشح المصادر المتوفرة , تعتبر هذة التجربة لأحد الاصدقاء مصدراً غني بالعديد من المعلومات التي لا بد ان العديد يبحث عنها . يرويها بلسانه : تكلفة فيزا اللجوء الى البرازيل 20 دولار من اي سفارة في اي منطقة بالعالم والاجراءات روتينية .
وبالنسبة للسوررين يعتبرهذا حقك بموجب الاتفاقية الموقعة بين البرازيل وسوريا لا أحد يستطيع منعك من الحصول على الفيزا .
لا تدع أ حد يستغلك او يستغل ظرفك كأن يقول لك عندي حدى بالسفارة او رح قدملك طلب نظامي على النت . اي شخص ما عليه سوى أن يذهب للسفارة ويقدم فيزا بنفسة . للبرازيل ويقول مثلاً: [مابعرف حدى هون مابقي معي مصاري مالي حدى يساعدني] - خلال ٣ ايام من الأردن 
ومن تركيا ٣ ايام أيضاً اذا أحضرت حجز طائرة تمنح الفيزا فورا ومن ماليزيا ومن لبنان ومن اي بلد بالعالم كلهن محترمين وبمشوك بسرعة بكل ادب واحترام… لاتدع أحد يستغلك !
اطلب ورقة اعفاء من السفارة لتستطيع حجز فقط ذهاب .. وتوفر اجرة تكت العودة.. عند وصولك مطار جواريليوس guarulhos ساو بالو
تستقل ,,تكسي,, يمكنك تشارك أجرتها مع بعض الراكبين على نفس الوجهه ممن قد تلتقيهم بالطائرة [٢٥ دولار او 20 دولار] بتصير بمنطقة اسمها براس [brass] نزلت بفندق رخيص انتبه على اغراضك ونقودك , انزل بالنهار على المنطقة سوق كبير[ رح تشوف مليون عربي وسوري،ولبناني ]. البلد جديد عليك مراعاه و احترم الناس و العادات و التقاليد .. .
اسأل عن جامع صلاح الدين منطقة براس او اذا كنت جنب المطار جامع جواريليوس .. مليان سوريين… وع فكرة اللجوء للفلسطيني واللبناني والجزائري والمصري والعربي والافريقي , البرازيل للجميع .
بالنسبة لاي شخص بيوصل البرازيل بتتوجه على مركز المدينة فندق رخيص في اليوم التالي تسأل عن الجامع في جامعين واحد للسنة وواحد للشيعة ..بتروح بتسأل ع سكن .. واذا ما حدى ساعدك بتسأل بالكنائس منشان تخلص من دفع الفندق بعدين بتروح لمركز كاريتاس منشان نقدم لجوء بتروح ع بكير لتحجز دور بعدين ..بيعطوك ورقة موعد مع الشرطة الفيدرالية مجرد ما تاخذ الورقة بتروح بتتصور 8 صور او اكتر قياس 2.5*3.5 الصور العادية تبع جواز السفر غير مقبولة بتروح عمركز الشرطة والمركز مذكور عنوانه بالصفحة .. رح تعمل ورقة واستعين بالعرب اللي عم يقدموا لجوء وفي ناس بتحكي انكليزي بس اخذت الورقة بترجع ع كريتاس بتسجلها وبعدين بتصورها وبتخبيها وبتشيل الصورة معك مدة الاقامة 6 اشهر لحتى تحصل على اقامة اللجوء… بترجع لكريتاس ويتطلب كرت الطعام وكرت النوادي وكرت الصحة هاد بتروح لاي مستشفى او مركز صحي للدولة قريب من بيتك وبطالعوا .. وين ما رحت خلي الصور بجيبك ولا تنسى اول شي تقدم على كرت العمل واذا رحت لمركز وعطوك موعد بعيد روح لمركز تاني وتالت ورابع لحتى تاخد دور قريب وفي محطتين محطة اسمها براس ومحطة اسمها سان بونيتوا هي مليانة عرب وشغل .. اجرة التاكسي من المطار لمركز المدينة 20 دولار 
الخدمات التي يحصل عليها اللاجئ السوري :
1- البرتوكول عبارة عن اقامة لمدة 6 اشهر وبتجدد من الشرطة الفيدرالية بساو بالو او بأي مكان اخر بالبرازيل 
2- ال CPF وهو الرقم الضريبي الخاص بك في البرازيل ويحتوي على مواليدك واسمك ورقمك الوطني وفيك من خلاله تفتح حساب بنك وتعمل شغلات كتير بمثابة هوية شخصية بتقضي فيها كتير شغلات بالبرازيل
3- بطاقة Sesc منشأة ترفيهية وفي الها فروع بكل البرازيل تحتوي ملاعب كرة قدم سلة طائرة تنس .. ارقى وانضف مسابح ... نوادي حديد ولياقة بدنية ..مجمعات للشواء والاكل والشرب وحدائق وعلى فكرة مو كل الناس بالبرازيل بتقدر تدخل هيك نوادي 
4- بطاقة Sesc food منشان الطعام وبموجب هي البطاقة بتروح على مطعم كتير مشهور واكلوا نضيف وعلى مستوى كتير راقي وميوزك ومليون شغلة بتاخد الوجبة اللي حقها 30 دولار بدولار ونصف .. تخفيض خيالي للاجئ السوري او العربي كمان في اوقات التخفيض بكون للنص واحيانا الوجبة اللي سعرها 30 ريل حقها بتدفع 3 ريل بموجب هي البطاقة 
5- بطاقة SUS او Saude هي البطاقة بطالعها بموجب البروتوكول او ال CPF او جوازك سفرك السوري وانا اليوم اتأكدت المطلوب جواز سفر CPF و برتوكول وبموجب هي البطاقة بتاخد لقاح وبتتعالج بشكل مجاني في افضل مستشفيات ساو بالو طبعا وين ما بتروح في دور وارقام وشاشات الكترونية ...
6 - لا تنسى تسجل اسمك في مركز Caritas بدورة لغة برتغالية .. واول ما بتبلش دورة جديدة بتصلوا فيك واكيد مراكز الدورة الكنائس او المدراس او المراكز اللي بمركز المدينة 4 ساعات الدرس يوم واحد بالاسبوع وشوي من النت ومن الاحتكاك مع البشر ببتتعلم اللغة وبتصير بلبل 
7- في شي اسمو مساعدة مالية هي حصريا بدك تحكي مع المسؤولة اسمها ماريا بمركز كاريتاس وهي اغلب الاحيان للعائلات اللي وضعها جدا تعبان
8- في شي اسمو سيستا بيزكا السلة الغذائية هي كمان للعائلات وكل فترة .. بيعطوها متل معونات
9- بموجب الاوراق البرتوكول السي بي اف .. بتقدر تسجل اولادك بالمدرسة ببلاش وبتقدر تعمل برتوكول عائلي
10- بالنسبة للجامعات بعد ما تاخد اقامة اللجوء وليس البرتوكول وتصير تعرف برتغالي قراءة وكتابة وعندك اوراق رسمية متل شهادة بكالوريا مصدقة ومترجمة فيك تعمل امتحان وتفوت جامعات للحكومة لانو الجامعات للبرازيلي غالية كثيرا .
للشباب اللي جايين وقاعدين بالفنادق فيك تروح لمركز كاريتاس وتطلب سكن وتقول انو ماعندك مصاري ومالك حدى رح يحولوك لسكن بشي كنيسة او مبنى تابع للدولة واكيد رح تنام بغرفة سكن مشترك .. وعندك خزانة لاغراضك لتمشي حالك بشغل وتنتقل لسكن خاص
موضوع السكن هون بدو عقد يمكن لسنه او 3 سنين والدفع كل شهر وممكن ياخدو لمدة 3 شهور وممكن يكون في تأمين وضروري يكون في شخص برازيلي ضامن
العربي والسوري محبوب بالبرازيل لانو شخص اجى على البلد حب البلد واسس واشتغل وصار عندو شركات بتمنى انت تكون متلوا 
البلد كبير وفيها حرية للاديان والبشر وكل واحد عايش متل ما بدو وما حدى بيتدخل بحدى .

#السفر_الى_البرازيل
.....................................................
الجنسية :
بمجرد زواجك من شخص يحمل الجنسية البرازيلية بامكانكم الحصول على الاقامة الدائمة لمدة عشر سنين وبعد فترة 4 شهور كحد أدنى لل 12 شهر كحد أقصى بقانون الجنسية البرازيلي بيتم منح الجنسية البرازيلية للزوج. و في ملاحظة هون انو مافي دولة تانية بتقدم الجنسية بعد الزواج بهي السرعة.
بحال قدوم مولود جديد ع الأراضي البرازيلية بينمنح المولود الجنسية البرازيلية فورا و الأبوين بيحصلوا عليها بعد سنتين من ولادة الطفل.
في حال مضى على اقامتك في الأراضي البرازيلية 15 سنة تمنح الجنسية البرازيلية .
اذا كنت موظف بشركة برازيلية خلال 3 سنين بتحصل على الجنسية.
عن طريق تملك عقار خلال 3 أو 4 سنين بتقدر التقديم على الجنسية البرازيلية .
أو في حال تبني طفل برازيلي تحصل على الجنسية فوراً .
السكن :
الاقامة بالفنادق بتتراوح بين الـ 30 إلى 110 دولار لليلة الواحدة وأغلب الفنادق العادية 50 دولار .
آجار استديو غرفة وصالون 300 - 500 دولار شهرياً
آجار منزل مكون من 4 غرف وأكثر 400 – 600 شهرياً
الأفضل اذا كنت شب لحالك ممكن تستأجر مع مجموعة شباب لتكسب خبرة عملية اكتر وتتبادل خبرة الهجرة بالبرازيل وتوفر على حالك مبلغ الأجار لوحدك.
العمل:
-طبيعة العمل بالبلد: جيدة.
طبيعة العمل بالبرازيل الها عائد مادي منيح بالنسبة للمستثمرين السوريين بالدرجة الأولى.
مهن فيها شغل حلو .. السياحة مزدهرة خاصة ان البرازيل ستقيم مباريات كأس العالم على أراضيها العام المقبل.
تعتبر مدينة ساو باولو هي أكبر المدن الإقتصادية في البرازيل وفيها فرص عمل جيدة و بتعتبر هي الملجأ الأول للجاليات العربية والسوريين.
بتعتبر العاصمة غالية كتير ولا ما بتنعد منطقة جيدة للإستقرار بسبب غلا اجور المنازل والفنادق .
المدن الشمالية هي الأرخص من حيث المعيشة.
العمل دائما في القطاع الخاص وممكن تعمل بالمطاعم وبشكل عام إذا ما كنت متقن للغة البرتغالية الراتب بكون أقل, يتراوح من 550 لـ 700 دولار شهرياً أما إذا كنت متقن الغة ممكن يوصل راتبك كحد أدنى 1000 دولار شهرياً .
ميزانية المشاريع كحد أدنى 75 ألف دولار لتسجيل المشروع بشكل رسمي بالبرازيل وهاد الشي بيساعد بالتسريع لمنحك الاقامة الدائمة.
السوريين بالبرازيل بيشكلوا رابع أكبر جالية بعد الألمان .. والثانية بين الجاليات العربية بعد اللبنانيين يعني بتقدر تحصل على عمل عند سوري وممكن يساعدك لو كان شغلك كويس ..
اللغة:
البرتغالية بالدرجة الأولى.
الإسبانية متداولة ومنتشرة بشكل كبير وهي لغة رسمية ببعض مناطق البرازيلية .
الإنجليزية بالدرجة الثالثة.
المصروف:
- وسطي المصروف للشخص العزابي من اكل وحاجات يومية: 400 دولار شهرياً
- وسطي المصروف لعيلة مكونة من 4 اشخاص من اكل وحاجات 800 دولار شهرياً
الدراسة:
مرحلة ماقبل المدرسة : التعليم اختياري وهو لمساعدة الولاد على التعلم دون سن 6 سنوات وما في أي مشكلة بالقبول .
التعليم الأساسي:
التعليم الأساسي إلزامي للأطفال من سن 6-14. والهدف من هالمرحلة هو ضمان معرفة القراءة والكتابة بشكل عامة، والشرط المسبق الوحيد للتسجيل بالسنة الأولى هي أن الطفل لازم يكون عمرو 6 سنين، ولكن بعض أنظمة التعليمتسمح للأطفال يلي عمرهون اقل من ال 6 سنين إلى للانخراط بالسنة الأولى
التعليم الثانوي : التعليم الثانوي 3 سنين وبحد ادنى 2200 ساعة من الدورات الدراسية عمدى 3 سنين.
التعليم العالي : التعليم العالي بالبرازيل بيكون تحت إشراف وزارة التعليم العالي والجامعي وهي كل ياتها بتخضع للمجلس الفيدرالي .
الإلتحاق بالجامعات البرازيلية بيكون بعد ما تساوي إختبار قبول جامعي و بيكون فيها بالدرجة الأولى امتحان للغة البرتغالية شامل لكل المواد بالنسبة لطلاب السنة الأولى .
أما يلي بدو يكمل لازم يجيب معو طلب نقل من جامعتو الأساسية يلي بلش فيها وبيعمل فحص لغة كمان
ويلي معو ديبلوم لازم يعدلو باحد جامعات الدولة حصراً والتعديل غالبا هو عبارة عن فحص لغة كمان ..
يعني المفتاح هو اللغة .. تعلم لغة وقول يارب ..
وبعد الحصول على البكالوريوس بيقوم خريجي كليات الطب والحقوق والإدارة بأداء اختبار على مستوى الدولة ككل قبل الإنخراط بسوق العمل.
تعتبر جامعة ساو باولو من أكبر الجامعات بالبرازيل و الأقوى علمياً .
العملة المحلية:
العملة الريال البرازيلي
كل دولار واحد بيساوي 2.25 ريال برازيلي.
الطعام:
الأكل في البرازيل بيختلف من منطقة لتانية حسب المناخ بهديك الولاية وأصل السكان فيها ..
المطبخ البرازيلي هو مزيج من المأكولات الأوروبية والأفريقيه و الاصليه, الوجبه الاساسية بالبرازيل بتتكون من الرز والفول واللحوم .
اللحوم رخيصة و سعرها متل سعر الخضرة .
حجز الطيران:
عن طريق مكاتب حجز بطاقات السفر.
نصائح عامة:
اذا ما بتحكي برتغالي او انكليزي الأفضل انك ما تطلع لهنيك، و اذا اجيت حط ببالك تتعلمها بست شهور بلالك هالسفرة من اصلها ...
الشعب البرازيلي ودود ومسالم ومن اهم ميزاته انو عندو فكرة جيدة عن العرب اجمالاً و بيعرفو العرب بالوسامة والأخلاق.
سمعة السوريين: سمعة السوريين بشكل عام ممتازة و بعكس اوروبا بيحبونا كتير لذلك حافظ على سمعتك ليبقو واثقين فيك.